Наргиз Гюлечова
Дагъустан Республикайин зегьметнанна яшайишдин артмиш’валин министерствойи инвалид касар ляхнихъди тямин апIбан программа уьмриз кечирмиш апIура.

Министерствойин пресс-гъуллугъ-наан тувнайи мялуматариинди, 2020-пи йисхъанмина инвалидарин жямяаьтлугъ тешкилатар арайиз гъахи юридический касариз субсидйир тувра. Субсидйир тувбан метлеб гьадму вуки, ляхнихъди тямин дапIнайи инвалидариз туврайи маважибдиз удучIвурайи харжарин саб пай кьяляхъ апIуб ва лихру йишвар уьрхюб ву.
Янаки, дицдар тешкилатариъ швнур инвалид кас лихураш дилигну, гьюкуматди 6 вазлин арайиъ гьарсарин кIулихъ 1 МРОТ-дин субсидйир тувра.
«Республикайиъ му программа ужуди кечирмиш шули, диди чан мянфяаьтлувал улупура. Мисал вуди гъадабгъиш, 2020-пи йисан 25 инвалид кас лихру йишвар уьрхбан бадали «Махачкалинское ПО «Электробытприбор» ООО-йиз 1 миллионна 500 агъзур манатдин субсидйир тувну. 2021-пи йисан кIуруш, республикайиъ кьюр дилаварчи касари 34 сакьат касари ляхин апIурайи йившвар гьаму программайиинди туврайи субсидйирин кюмекниинди гъюрхну. Хъа сач, 2025-пи йисан, «Мягьячгъалайин яшайишдинна зегьметнан «Анжи» кархана» ООО-йиъ лихурайи 32 инвалидарин лихру йишвар уьрхбан бадали, 4 миллионна 600 агъзур манатдин субсидйир тувну.
Гьюкуматдин терефнаан гьамциб кюмек айивализ лигну, дицдар касариз ужуб маважиб гъадабгъуз, хъа дилаварчйириз кIуруш, гьацдар касар ляхнихъди тямин апIуз мумкинвал шула», — мядум гъапIну министерствойин пресс-гъуллугънаан.
Къайд дапIну ккундуки, эгер программайиъ иштирак хьуз ккуни карханйир аш, дуарихьан бикарариз ляхин тувру центриз илтIикIуз шулу.