Гюльнара Мягьямедова
Коронавирусдин уьзур тарабгънайи вахтна гьюкуматдин терефнаан бицIидар хъайи хизанариз пулин жюрбежюр кюмекар тувуз хъюгънийи. Пулин думу дакьатар тяйин апIбан бадали, Госуслуги порталиъ, ясана Пенсионный фонднан сайтдиъ аьрза гъитувалтIан лазим дайи, цIиб вахтналан банкдин карточкайиина пул гъюйи.

 

Гьюкуматдин терефнаан вуйи пулин кюмек, аьдат вуйиси, саб ражари тувруб ясана касибвал кайивализ дилигну, улупнайи кьадар вахтнаъ тувруб шулу.
Гьаму йисан январин вазлилан башламиш дапIну, Урусатдин социальный фондну 9 миллиондилан зиина бицIидарин абйир-бабариз пособие тяйин гъапIну. Гьадму кьадарнакан 544 425 бицIир Дагъустандиан ву.

Пособие социальный казначействойин гьисабариан тяйин апIура. Жара гафариинди, пособие гъадабгъбан бадали, абйир-бабари Госуслуги порталиъ аьрза бикIувал чIяаьн шула. Имбу улупбар Социальный фондну идарйирин арайиъ айи аьлакьйириинди ахтармиш апIуру. Абйир-бабариз рягьятди хьпан бадали, пособие рубкьру вари бицIидар саб аьрзайиъ улупуру.

Республикайин социальный фонднан кIулиъ айирин вазифйир тамам апIурайи Шарабудин Даришмягьямедовди кIваина гъабхиганси, пособие тяйин апIбан бадали абйир-бабар ва бицIидар Урусатдин ватандашар вуди ва гьаммишан Урусатдиъ яшамиш шули ккунду.
Дагъустан Республикайиъ яшамиш хьпан бадали улупнайи варитIан цIиб вуйи кьадар пулиз дилигну, бицIидариз пособиейин 50%, 75%, 100% тяйин апIура.
Гьацира къайд апIувал лазим вуки, пособие тяйин апIруган, хизандиз айи хусусият, мал-девлет, абйир-бабар лихури аш-адарш, лихури адрувалин дугъри себебар гьисабназ гъадагъуру.

Зиихъ гъапи кьадар бицIидариз пособие гъюри ашра, республикайиъ игьтияж айи, амма пособие гъюри адру хизанар гизаф гъузра. Дицисдар хизанар МФЦ-йиз, Социальный фондназ документар хьади илтIикIну ккунду.