Наргиз Гюлечова 

Гьаму йисан октябрин вазли «Сарпидарин лига: Урусатдин халкьарин кьувватнанна сабвалин студентарин футболин лига» вариурусатдин проект ляхник кипну. Думу проектдиъ ихь уьлкейин 13 региондиан 64 командайин дахилнаъди, колледжариъна техникумариъ урхурайи 5 агъзурна 500-тIан артухъ студентар иштирак хьиди, гьадму гьисабнаан ихь республикайианра.

Ихь региондиъ спортдин му серенжем РД-йин жигьиларин ляхнариз лигру министерствойин, «Сарпидарин гьяракатнан» ва Дербент шагьрин администрацияйин кюмекниинди тешкил дапIнайиб ву. Проектдин асас метлеб – футбол инсанарин арайиъ яркьуди тарабгъуб ва халкьарин арайиъ айи сабвал ижми апIуб ву. 

«Сарпидарин лига: Урусатдин халкьарин кьувватнанна сабвалин студентарин футболин лига» проектдикан улихьна йигъари кIули гъубшу пресс-конференцияйиъ «Сарпидарин гьяракатнан» Дагъустандин отделениейин кIулиъ айи Людмила Сяидовайи ва Республикайин футболиин юкIв алидарин федерацияйин президент Рамазан Гъазиевди мялуматар тувну. Дурари гъапиганси, проектдиъ улупнайи 13 региондиъ – Севастополиъ, Крымдиъ, Кафари Кавказдин республикйириъ, Ставропол крайиъ, Донецк ва Луганск халкьарин республикйириъ, Запорожский ва Херсонский областариъ колледжарин, техникумарин студентарин футболин командйиригъян ужударсдар гъядягъбан талитар хьиди. 

Рамазан Гъязиевди гафариинди, футболин командайирси, му проектдин дахилнаъди командйирихъанди вуйи гьевескрар студентарин фан-клубарра тешкил апIиди, студентарин арайиъ командйирикан мялутар тувру медиаволонтерра агиди. 

«13 регионариан проектдиъ иштирак шлу 64 командайиригъян финализ анжагъ 16 командатIан удучIвидар. Дурар 4 дестейиз жара апIиди. Проект гьяракатнаъ ипхъанмина, сабпи йисан Дагъустандин, кьюбпи йисан Ингушенияйин команда гъалибчйир гъахьну. Цци финалин пай Дербентдин «Нарын-Гъала» стадиондиин 8х8 кIалибнаъди кIули гъягъиди ва проектдиъ иштирак шлу 16 командайи 32 талитариъ иштираквал апIиди. 

Аьдат вуйиганси, натижйир йивбан серенжемдиз учу пишекарвалиинди ляхин апIурайи футболин клубарин вакилариз ва футболистар гъюдюхру пишекрариз дих апIидича. Дурари проектдиъ иштирак шулайи студентарин командйиригъян ужударсдар футболистар гъядягъну, дурариз чпин клубариз футбол апIуз теклиф дивди»,- аьлава гъапIну Рамазан Гъазиевди.