Гюлягьмад Маллялиев
2023-пи йисан 14-пи август Дагъустандин цIийи деврин тарихдиъ кIару йигъси убчIвди. Ислягь вахтну, хябяхъган жвуван ляхнариз гьаракат апIурайи, сейриз удучIвнайи, федеральный трассайиин машиндиъди гъягъюрайи варждилан зина инсанар кIваин алдру завалин йисирар гъахьну.
Къумторкала райондин Новокули гъулан аьтрафдиъ (Мягьячгъалайихьан гизаф ярхла дар) йишвну сяаьт 10-ди аьхю пакь гъапIнийи. Думу машинар рас апIру карханайиъ машиндик кабхъу цIин цIюмгъларилан аммиачный селитрайик (думу автосервисдин гъвалахъ хъайи складдиъ къанунсузди уьбхюради гъабхьну) кубкIувалилан арайиз гъафну. Хъасин, цIа гъадабгъу селитрайи зур пакь гъапIган, диди складра, автосервис дармадагъин гъапIну ва ялав рякъюн тмуну терефнаъ складдиз гъаншариъ айи «Нафта-24» АЗС-диин алжабгъну ва душваъра газ айи 8 цистернйирикан кьюб гъутIуркIну.
Гъийин йигъаз айи мялуматаринди, му бедбахтвалин натижайиъ 35 кас гъийихну, гьаму гьисабнаан 3 бицIирра. Гъийихдарикан гьелелиг 13 кастIан, дурар фужар вуш, якьинди аьгъю гъапIуз дубхьнадар, фицики цIин ялавну гизафдар бегьемди гъургну. ВаржтIан зина инсанариз жюрбежюр зийнар гъахьну. Гъи республикайин больницйириъ 47 касдиз медицинайин кюмек туври ами. 16 лап гъагъи гьялнаъ айидар Москвайин больницйириз сагъ апIуз МЧС-дин хусуси метлеб айи самолетдиъди гъухну.
ЙицIбариинди инсанарин хусуси машинар гъургну, хайлиндариз мал-мутмуйин зарар гъабхьну, фицики тIуркIбар гъахьи йишвхьан 150-200 метр манзилнаъ айидарин хуларин улдарин гюзгйир, унчIварин гурзлар тIуркIбан лепейин гужну гъидирчну.
Дагъустанлуйири му читин вядайи чпиз хас вуйи лишнар – кьаза-балайиъ айириз кюмек тувувал, хатIайин улихь битав хьувал, инсанар бадали жвуван жан ва ифи гьяйиф дарапIрувал – улупну. Дишла зиян дубхьнайидариз кюмек апIуз тIуркIбар гъахьи йишв’ина аьдати инсанар гъюз хъюгънийи. Саб суткайин арайиъ жарарин бала жвуванси гьисс апIру дагъустанлуйири 600 литр ифи тувну.
Республикйин кIулиъ айидарра му заваликк ккахъдарин аьхю гъай-гъушнаъ гъахьну – дишла вакьиа дубхьнайи йишваз республикайин кIулиъ айи Сергей Меликов, правительствойин председатель Аьбдулмуслим Аьбдулмуслимов, министерствйирин кIулиъ айидар, депутатар гъафну ва завалин натижйир арайиан адагъбан ляхнин кIулиъ дийигъну. Меликовдин къарарниинди, гъийихдарин хизанариз республикайин резервдин фонднаан 1 млн манат, пучIу зийнар гъахидариз 200 агъзур, хъа сагъламвализ гъагъи зийнар гъахьидариз – 400 агъзур манат тувди. Меликовди гъийихдар кивбан харжар ахьубра ерли гьюкмарин кIулиъ айидариз табшурмиш дапIна.
Гьелбетда, гьаци дубхьнура ккунду… Хъа дюзди кIуруш, дици дубхьну ккундайи. Мициб пашман дюшюш арайиз гъюз гъитну ккундайи. Силис гъабхру органарин вакилари кIурайиганси, му бедбахтвалин себеб – автосервисдин аьтрафариин къанунсузди аммиачный селитра уьбхюрайивал гъабхьну. Эгер ахтармишар гъахру идарйирин вакилари чпин вазифйир намуслуди тамам апIуйиш, руш’ват дибисну, тахсиркрариз гележегдиъра къанун чIур апIуз мумкинвал туврадайиш, гъи ихь 35 ватанагьли чIивиди гъузуб мумкин вуйи.
Ухькан гьарсари, жвувхьан шлуб апIури, ихь жилиин мициб кьаза-бала сарун текрар хьуз гъитну ккундар
