Гюльнара Мягьямедова

14-пи мартди республикайин Сергей Меликовди Дагъустан уьлкейин президент ктагъбан сечкйириз гьязурлугвализ бахш дапIнайи совещание кIули гъубху.

 

Асас доклад хьади серенжемдиъ РД-йин Избиркомдин председатель Мягьямед Дибиров удучIвну гъулхну. Дугъу туву мялуматариинди, сечкийин кампанияйин ляхин аьтрафарин сечкйирин 54 комиссияйи ва участокарин сечкйирин 1862 комиссияйи гъабхиди. Сечкйирин гьарсаб комиссия лазим вуйи йишвахъди ва авадлугъарихъди, гьадму гьисабнаъди рукь абгру детекторарихъди, видеокамерйирихъди, лазим гъабхьиш, аьлава вуди электричество тувру генераторарихъди тямин дапIна.

Дагъустандиъ сечкйириъ иштирак шлударин сиягьариз 1,7 миллион сечкичйир гъадагъна. Комиссйирин 14 агъзуриинакьан членар сечкйир тешкил апIбан ляхниин машгъул духьна.
Аьлакьа кьатI дархьбан бадали, «Ростелекомдихъди» ва «Электросвяздихъди», гьадму гьисабнаъди гьюкуматдин «Сечкйир» автоматизированный гъурулушдин гьякьнаан месэлйир гьял дапIна.

Республикайиъ 137 участокдиъ сес тувру бюллютенар тартиб апIру комплексар (КОИБ) ишлетмиш апIиди. Сесер тувру 688 участокдиъ видеонаблюдение гъабхиди. Имбу участокариъ видеофиксацияйин дакьатар дивна.

Региондиъ сесер тувбахъди 6 агъзурилан зиина вакилари гюзчивал гъабхиди. Республикайиъ гъягъюрайи сечкйирикан 28 СМИ-йи ва аккредитация дапIнайи 117 журналистди мялуматар тувди.

КIваина хурача, Урусатдин Президент ктагъбан сечкйир шубуд йигъан – 15-17-пи мартди гъягъиди. Сечкйирин участокар 15-пи мартдиъ гвачIнинган сяаьт миржибдиъ ачмиш апIуру ва йишвандин сяаьт миржибдизкьан лихуру. Сечкйирин участокар имбуну йигъарира гьациб къайдайиинди лихиди.