Зубайдат Шябанова
Гъябгъюрайи йисан мартдин 15-17-пи йигъари Урусатдин Президент ктагъбан сечкйир гъягъиди. «Табасарандин нурар» газатдин редакцияйи думу сечкйириз тялукь вуди «Узу гьаз сечкйириз гъягъюру?» кIуру хусуси бицIи проект гьяракатнаъ ипра. Гьаму проектдиъ табасаран халкьдин вакилари чпи сечкйириъ иштирак шулуш, гьаз му серенжемар важиблу вуш, Урусатдин президент ктагъували фтиз тясир ва манигъвал тувруш, фициб къайдайиинди чпи сесер тувруш, ктибтура. Чан фикир газатдин машариъ фуну касдихьанра ачухъ апIуз шулу. Ичв фикрар ва жавабар газатдин zori@etnomediadag.ru почтайиз хъадаай. Хъа гъи ич суалариз жавабар туву бязи касарин фикрар чап апIурача.
Нефтулла Гьяжиев, дилаварчи:
«Уьлкейиъ къайда-низам чIур ва зяиф хьуз гъитну ккундар. Урусатдин кIулиъ кьувватлу ва сабдихьанра гудручIру, сабурлу ва рягьимлу руководитель хьпан бадали, ухьу вари сечкйириз душну ккунду. Хъа гъи Урусатдин улихь дийигъурайи Западдин ва НАТО-йин гьюкуматариз къаршувал улупуз анжагъ хасиятнан кьувватлу регьбрихьантIан шулдар. Гьаддиз узу ихь ватандин азадвалихъанди ва сариланра асиллу дарувалихъанди сес тувуз гъягъюрза. Ирандин журналистди гъапну: Донбассдиъ айи чан вакилар бадали Урусат вари НАТО-йиз гъаршуди дийигъну, хъа вари уьлкйириъ айи 2 миллиард мусурмнарихьан Палестинайихъанди гаф пуз шуладар. Вари дюн’яйиъ Урусат кьувватлу, военный цирклиан, экономикайиан улихь хьайи уьлке гьисаб апIура. Санкцйиризра дилигди, уьлке артмиш шула. Мюгькам хизан хьувал эйсийилан асиллу ву. Уьлкера аьхю саб хизан ву. Кьувватлу ва вари терефариан гьубкIну зигьим айи регьбрихьантIан Урусат гьамци гужал апIуз хьибдайи. Гележегдиъра Ватан гужалди артмиш хьпан бадали, узуз йиз сес шлихъанди тувруш аьгъязуз».
Марьям Шихялиева, мялим:
«Гьамусяаьт уьлкейиин гъагъи йисар улукьна. Хусуси метлеб айи дявдин операция гъябгъюра. Иллагьки гьаму вахтна ухьу ихь сабвал улупну, сатIи духьну ккунду. ИкибаштIан, узу сечкйириз гъягъюрза ва вари дюн’яйиъ Урусатди лайикьлу йишв бисуз гъитру кандидатдихъанди йиз сес тувурза. Ихь сесерилан Урусатдин гележег ва СВО-йин натижа асиллу ву».
Сабир Дашдемиров, СВО-йин эскер:
«Сечкйириз гъягъювалин ихтияр ишлетмиш дарапIуб – му багъри ватандихьна вижнасузвал улупбак гьисаб ву. Хайлин харижи гьюкуматарин ихь уьлке ккидипуз кьаст а. Гьаддиз ухьу Урусатдин кIулиъ гужли хасият ва идара апIбан ужуб тажруба айи руководителихъан сес тувуз душну ккунду.Хайлиндари чпин гъулан рякъярикан, ЖКХ-йин месэл-йирикан суалар туври шулу. Хъа сечкйириз дурушру касдиз думу суалар тувуз ихтияр айинхъа?! Женгнаъ эскру гьунар улупбан бадали, далу терефнаъ дугъхъан юкIв убгурайи асккан гьисаб шубур кас хъади ккунду. Уьмрин тажрубайи улупурайиганси, гъийин девриъ Президентдин сечкйирихьна вижнасузди гъузну ккундар. Сечкйириъ ухьу Ихь гьюкуматдин гележег ктабгъурахьа. Хъа думу гележег ухьузси, ихь веледаризра важиблу ву. Закурин йигъкан ва багъри веледарин гележегдикан фикир кайи кас сечкйириз гъягъиди».
Милана Дадашева, кейвани:
«Сечкйириъ иштирак хьувал – му ватандихьна ккунивал, сечкйириъ гъалибвал гъадабгъру регьбрихьна гьюрмат ва жвуван фикир ачухъ апIувал ву. Уьлкейин кIулиъ айири варитIан важиблу месэлйир, ляхнар ва яшайишдин шартIар гьял апIура. Йиз уьмриъ варитIан важиблуб узуз йиз хизан, багахьлуйир вузуз. Ихь уьлкейиъ хизандин месэлйириз аьхю фикир туврайивалиин рази дархьиди гъузуз шулдар. Кюгьне вахтарихъанмина айи ихь аьдатар, эдеблувал, гъир’ят ва намус дюбхну ккунду. Дурариз ихь халкьарин арайиъ хайлин аьсрар улихьна чпин йишв дибихъна. Гьаддиз узу сабпи нубатнаъди хизандин багьалу савкьатар уьрхюри, сечкйириз йиз сес тувуз гъягъюрза».
Мартин Сефербегов, спортсмен, тренер:
«Ихь уьлке ва республика фици артмиш шулаш, вари шагьидар вухьа. Социалин цирклиъ диврайи тикилишарин аьхю кьадарниин шад дархьиди гъузуз шулдар. Республикайиъ аьхиримжи йисари 100-тIан артухъ анжагъ спортдин тикилишар арайиз духна. Табасаран районра кьяляхъ гъубзрадар. Райондиъ спортдин дараматар къайдайиз хура, футболин, волейболин хайлин майднар арццра. Гъийин баяр-шубариз спортдиин машгъул хьуз вари жюрейин шараитар арайиз духна. Учу бицIи баяр вуйи йисари мицисдар мумкинвалар ич кIван мурад вуди гъабхьнийич. Райондин гъийин хъуркьувалар ухьу сечкйириъ лазим вуйи инсанарихъанди сесер тувиган гъабхьи натижа ву. Гьамус президент ктагъру сечкйириъ ухьу вари уьлкейикан фикир дапIну ккунду. Ихь уьлке хайлин йисари мюгькамди артмиш хьпан бадали, сечкйириз душну ккунду».
Сеид Расулов, студент:
«Колледж ккудубкIган, узу электрикди лихуз гъягъюрза. Йиз ляхниъ узу заан дережайин пишекар духьну ккундузуз. Йиз кIваъ айи хиялар тамам хьпан бадали, кьувватлу хил ва хасият хъайи президент кIулиъ айи мюгькам уьлке лазим ву. Йиз сечкйириъ иштирак шули сабпи раж вуйиз. Уьлкейин регьбер ктагъру сечкйириъ йиз сес лазим вуйибси гьисс апIураза. Ватандин регьбер ктагъру асас серенжемарихьан жигьилар гъирагъдиъ гъузну ккундар, фицики уьлкейин гележег давам апIрудар гъийин жигьилар ву. Узуз йиз сес шлихъан тувруш аьгъязуз. Ва гьаддиин дийигъурза».
