Зубайдат Шябанова
Сентябрин 18-пи, 19-пи ва 20-пи йигъари Урусат Федерацияйин Государственный Думайиз ва Дагъустандин Республикайин Халкьдин Собраниейиз депутатар ктагъбан сечкйир кIули гъягъиди. Думу сечкйириъ 450 депутат ктагъуру.

Дагъустан Республикайин Халкьдин Собраниейиз партийный сиягьариинди сабвуйи избирательный округдиан 90 депутат ктагъуру.
Табасаран район сечкйирихьна фици гьязур шулаш аьгъю апIуб метлеб ади, узу Табасаран райондин ТИК-дин председатель Исамудин Исаевдихьна илтIикIунза.

 
«Цци 1-пи июлиз Табасаран райондиъ сечкйир тувру 34610 кас гьисабназ гъадагъна.
Табасаран райондин глава Мягьямед Къурбановди кьабул гъапIу къарарниинди, райондиъ сесер тувру 66 йишв гьязур дапIна. Дурарикан 49 йишв мектебариъ, 11 йишв клубариъ, 5 йишв МКДОУ-йин идарйириъ ва 1 йишв СикIухъ гъулан халачйирин цехдиъ арццна. Думу йишвариъ, чпин сесер тувуз ихтиярра ади, комиссияйин 403 вакили гюзчивал гъабхиди», – мялумат тувну Исамудин Исаевди. Дугъу къайд гъапIганси, му улупнайи йишвариъ жюрбежюр себебар арайиз гъафиш, сечкйир дедрерккбан бадали сесер тувру аьлава пунктар арццру йишварра гьязур дапIна.

 
СиртIич, ТинитI, Жулжагъ, Хянягъ, Хюрикк, Дарвагъ, ТIивак гъуларин сечкйир гъягъру йишвариъ онлайн видеокамера, хъа имбу йишвариъ видеорегистраторар хьиди.

«Гъи сечкйир лап гъагъи вахтна, яни хусуси метлеб айи дявдин операция гъябгъюрайи йигъари гъахурахьа. Гьаддиз ихь уьлкейиз гьарсаб сес, иллагьки гьаму вахтна лап важиблу ву. Сесер тувуз гъювалихьна агьалйирин гьевес артухъ хьпан, сечкйирикан шлубкьан артухъ хабар хьпан бадали центральный сечкйирин комиссияйи швнуд-сад йигъ улихьна мялуматар тувну. Думу Информ-УИК ччвур тувнайи акция Табасаран райондин аьтрафариинра 28-пи августдиан 6-пи сентябриз гъубхунча. Райондин 90 проценттIан артухъ агьалйирихьна сечкйир гъягъруваликан, регистрация дапIнайи депутатарикан, политикайин партйирикан, сесер тувбан къайдайикан мялуматар гъурукьну. Информ-УИК-ди туву мялуматарин кюмекниинди сечкйириз гъюру агьалйирин кьадар артухъ шлувалик миж кивраза. Табасаран райондин сечкйирин комиссияйин участокдин председатель вуди, багъри райондин гьарсар ватандашдихьна илтIикIураза: «Гьюрматлу дустар, 18-пи, 19-пи ва 20-пи сентябри сечкйир гъягъру участокариз гъачай ва ичв сес учвуз ккуни депутатдихъан ва политикайин партияйихъан тувай», – гъапну Исамудин Исаевди.