Гюльнара Мягьямедова
Региондиъ гъургъу мархьариан агьалйириз гъахьи читинвалариан удучIвбан месэлйирикан гаф-чIал апIбан бадали, 14-пи апрели Дагъустандин глава Сергей Меликовди журналистар, блогерар ва жямяаьтлугъдин вакилар уч гъапIнийи. Бязи мялуматарин дакьатари глава гъуллугънаан удучIвбанди вуйиваликан туврайи хабрарра кади, республикайин кIулиъ айири дурарин учIру суалариз хъайи-хъайиси жавабар тувну. Сергей Меликовди гъапиганси, гъуллугънаан удучIвбан месэла фуну йигъан вушра гьял хьуз мумкин ву, аммаки думу къарар кьабул апIрур уьлкейин президент Владимир Путин ву.
Сюгьбат ккебгъри Сергей Меликовди къайд гъапIганси, КIежхин шид уьбхюрайи банд гьутIубчIвбахъан жавабдарвал гъабхурайи инсанарин ляхниз кьимат тувуз сабан ухди ву. Му дюшюшнан гьякьнаан уголовный дело гъитIибккна, гьаддиз силис гъабхбан кьяляхъ судди «тахсирнан дережайиз кьимат тувди». «Гъуллугънаъ айидарин вижнасузвал жин апIуз ккунир адар, хъа аьгьвалат гизаф читинуб гъабхьну. КIежхин банд гъургъу аьхю мархьариан гьутIубччвну. Думу ляхин сяътарин арайиъ гьяракатниинди гъабхьиб ву. Ухьуз тахсир кипуз ужур тувиш, вари гьадгъуин алапIурухьа. Дици дубхьну ккундар», – гъапну Сергей Меликовди. Дидихъди сабси, региондин главайи мархьар ургъбахьна гьязурлугвалин ляхин лазим дережайиъди дубхну адрувал тасдикь гъапIну, гьаци вуйиб табиаьтдин завалира субут гъапIну.
Зарар гъабхьидариз тувру компенсацйирикан улхури, Дагъустандин главайи вари зарар гъабхьидар шубуб йишваз пай дапIнайи сиягьнакан ктибтнийи. Сабпидар – документар айи хуларин эйсйир, кьюбпидар – хуларин документарин саб пай айидар, шубубпидар – хуларин эйсивалин документар зат адрудар. Сергей Меликовди гъапиганси, пул варидариз тувди, хъа фуну хизандиз фукьан тувруш, комиссияйи гьял апIиди.
Уч духьнайидариз Сергей Мели-ковди хабар тувганси, республикайиъ 2024-пи йисан гьамутIан аьхю балайикк ккабхъу Оренбургдин областдиан дуфнайи пишекрарира ляхин апIура. Кьюд йисандин арайиъ душваъ шид улубчIвбаан зарар гъабхьи хизанарин 3,5 агъзур аьрзайиинди пулин кюмек тувну ккудубкIну. «Таза кIул’ан велосипед адабгъидархьа: гьадрарин методика ишлетмиш апIидихьа. Верховный кIулин командующийин метлеб зарар гъабхьи вари хизанариз компенсация тувуб ву», – гъапнийи региондин главайи.
Сергей Меликовди социальный сетариъ айи, «зарар гъабхьидарихъди гафар апIруган, гъаравлар хъади лицура» кIуру жюрейин кялхъбан улхбаризра жаваб тувну. Республикайин главайи чан хатIасузвалихъан хусуси метлеб айи гъуллугъар жавабдар вуйиваликан, ва, гъаравлар хътарди лицбан бадали, «кагъаз» дибикIну ккуниваликан гъапнийи. «Гъаравлари шлиз манигъвал гъапIнийи? Эгер Дагъустандиз гьамкьан читин вахтна гьял апIуз жара месэла адарш, чпиз кьимат чпи туври. Эгер думу кьимат лайкариинди ва дизлайкариинди ебцураш, кьюбибра чпиз артухъ ибшри. Дицисдар инсанарихъди улхбар гъахузкьан ккундарзуз», – гъапнийи Сергей Меликовди.
Республикайин главайи чан гъуллугънан ихтиярар гьаму йисан чвну ккудукIурайиваликан хабар тувнийи. Къанундиз асас вуди, Урусатдин президентди Дагъустандин парламентдиз республикайин главайин гъуллугъниина 3 кандидат улупиди.
«КIваантIан кIураза, думу сиягьнаъ узу шулуш–шулдарш, узуз аьгъдарзуз. Эгер гьациб гьюрматназ узу лайикь вуш, шад вуза, хъа дарш, главайин гъуллугънаан удучIвуб инсанвалиинди кьабул апIидиза», – гъапнийи Меликовди.
Гюрюшмиш хьувалин аьхириъ сар блогери гьюкуматдин комиссияйин дахилнаъди Дагъустандиз гъафи Урусатдин президентдин Дальний Востокдиъ гьуркIу ихтиярар айи вакилин заместитель Мягьямад Рамазановдин ляхниз кьимат тувуб ккун гъапIнийи. «Гизаф месэлйир гьял апIбаъ ич фикрар дархьрайич, къарарар кьабул апIбахънара сатIиди гъюрача», – жаваб тувнийи Дагъустандин кIулиъ айири.
