Зубайдат Шябанова
Улихьна йигъари Мягьячгъала шагьриъ республикайин шахматарин хулаъ «Адаш, дада, узу – шахматариин юкIв али хизан» ччвур али республикайин шахматарин турнир кIули гъубшну.
Талитариъ гьарсаб командайиъ хизандин кьюр кас ади ккундийи — веледна адаш вая дада. Спортдинна зигьим артмиш апIбан талитарин натижайиъ сабпи йишв Табасаран райондин НичIрас гъул’ан вуйи Мукаиловарин хизанди гъадабгъну. Кьюбпи ва шубубпи йишварин сагьибар Мягьячгъала шагьриан вуйи Чарабураеварин ва Хиряеварин хизанар гъахьну.
Турнир республикайин шахматарин федерацияйи ва РД-йин образованиейин ва илимдин министерствойи, Мягьячгъала шагьрин Советский райондин администрацияйин кюмекниинди тешкил гъапIнийи.
Турнирин кьяляхъ ич сюгьбатнаъ талитарин гъалибчи, НичIрас гъулан мектебдин директор Ризван Мукаиловди ктибтганси, талитар заан дережайиъди тешкил дапIнайи ва лап маракьлуди кIули гъушнийи.
«Турнириъ 8 команда иштирак гъахьну. Дурар шубуб Мягьячгъала шагьрин, кьюб Каспийскдин, са-саб Хасавюрт, Табасаран ва Къяякент районарин хизанарин командйир вуйи. Дюзди гъапиш, талитариъ иштирак шули йиз сабпи раж вуйиз. Хъа йиз бай Мягьямедди, республикайин шахматарин талитариъ гьаммишан иштирак шули, гъалибвалин заан йишвар гъазанмиш апIура. Гьаму йисан майдин эвелариъра думу чан яшарин живанарин арайиъ Дагъустандин чемпион гъахьну. Багарихьди Дагъустандиъ шахматарин сабсана чIатху турнир тешкил апIура. Мягьямед гьадушваъра иштирак хьуз гьязур шула.
Хизандин талитарикан улхуруш, вари командйир ужуйи гьязурвал айидар вуйи. Асас вуди Хиряеварин командайикан кIураза. Дурари, республикайиъси, саки Урусатдин талитариъра швнуб-саб ражари гъалибвалар гъазанмиш гъапIну. Учуз турнириъ иштирак хьуз республикайин шахматарин мектебдиан ва РД-йин образованиейин министерствойин терефнаан теклиф дивнийи», – гъапну Ризван Мукаиловди ич сюгьбатнаъ.
Хизандин йисаз тялукь вуди гъуху республикайин шахматарин турнирин гъалибчйир Табасаран райондин глава Мягьямед Къурбановдира тебрик гъапIну.
«Мукаиловарин хизанди Табасаран райондин тереф республикайин талитариъ заан дережайиинди уьбхюри сабпи раж дар. Шахматарин талитариъ дурари гъадагъурайи хъуркьувалариин кIваантIан шад вуза. Дурарин шахматарин женгнаъ гъалибвалихъна хурайи стратегический фикриинна заан зигьмин мумкинвалариин гьяйран дархьиди гъузуз шулдар. Мукаиловарин хизандиз гележегдиъра хъуркьувалар ишри!», – гъапну Мягьямед Къурбановди.
Муниципалитетдин кIулиъ айири жигьил наслин зигьимдин мумкинвалар артмиш хьуз гъитуб важиблу вуйиб къайд апIури, райондиъ шахматарин спортдиз гележегдиъра артухъ фикир тувну ккуниваликан гъапну.
