Мейлан Нежефов

Цци 11-пи июндиъ Советарин деврин табасаран литературайин ккиришрар ккиву шаир, мялим ва жямяаьтлугъ кас Манаф Шамхалов Хив гъулаъ бабкан духьну 109 йис тамам гъабхьну.

 

Хиварин гъулан библиотекайин гъуллугъчйири, шаир фикриъ уьрхюри, бицIидариз дугъан уьмрикан ва яратмиш`валин рякъкан ктибтбан ачухъ дарс кIули гъубхнийи.
«Гьаму йис ихь республикайин главайин къарарниинди литературайиз хъайивал айиб шула. Гьаци учура кми-кмиди дагъустандин шаирарихъди ихь бажаранлу шаирар кIваин апIури, аргъаж шулайи наслар дурарин уьмрихъди ва яратмиш`валин рякъюхъди таниш апIурача. Гъийин классдин гъирагъдихь урхбан дарс Манаф Шамхаловдикан вуйич. Дугъу табасаранарик сарпидарикан вуди, педагогвалин техникум, хъасин областдин партийный мекетб ккудкбIну. М.Шамхалов табасаран литературайиъ сабпи роман («Дюзмиш гъабши дере») гъибикIур ву. Дугъан шиърар урхури, дурарин анализ гъабхури, баяр-шубар таза гафарин гъаврикк ккаъбиин ва дурарарин чIал ккатIабццбиин гъилихнийча. Аьхириъ шаир яшамиш шули ва ляхин апIури гъахьи хуларин цалиъ ибтнайи мармардашдин гъвандин улихь кюкйир дивнийча», – кIура библиотекайин гъарашугъ Зубарият Рамазановайи.

Шаирин бицIину бай Замирин уьмрин юлдаш, гьаммишан хялариз маш ачухъди шлу, мухан лавашра гьивуз гьунар кайи Гъизил Шамхаловайи му дарснакан чан фикрарра ачухъ апIура: «Баяр-шубарихъди гьамциб иштагьниинди яркьу ляхин гъабхруган, дурарин багъри литературайихьна вуйи лигуб ва думу урхуб саб кьадар за шула. Узура бицIи классарин мялим вуза. Гъийин заманайин веледар литературайихьна жалб апIбан бадали, анжах гьамци ляхин гъабхуб ву гъубзрайиб. Дурариз, чпи кIул`инди урх гъапну кIури, кар апIурадар, я гъурхишра, сабдинра гъавриъ шуладар. Саб гафниинди, классдин гъирагъдихь вуйи ва табиаьтдиъ сейир апIбан дарсар гъахури, бицIидарихьди гъи ихь литература урхуз гъитуз, дурариз дидкан мюнфяаьт ктабгъуз улупуз ва гьацира ихь шаирарихьна вуйи гьюрматна ккунивал заанди дибисну гъибтуз ухьу чарйир агури духьну ккунду».