Зубайдат Шябанова
Хючна гъулаъ 6-7-пи апрели Табасаран райондин мектебариъ урхурайидарин арайиъ урус шашкйириан финалин талитар кIули гъушну. 11 йис дубхьну адру баяр-шубарин арайиъ талитар швейцарский къайдайиинди гъухну. Думу дестейин баярин арайиъ улупнайи 6 очкойикан 5,5 очко гъазанмиш дапIну, 1-пи йишв Ягъдигъ гъулан 1-пи мектебдиъ урхурайи Мугьяммад Гьясанбеговди гъадабгъну, 2-пи йишваз Гувлигъ гъулан мектебдиъ урхурайи Карим Гьяжигъурбанов, 3-пи йишваз Хянягъ гъулан мектебдиъ урхурайи Мягьямед Мягьямедов лайикьлу гъахьну.
Шубарин арайиъ 1-пи йишв Ягъдигъарин 1-пи мектебдин вакил Альфия Ражабовайи гъадабгъну. Мягьрягъ гъулан мектебдиъ урхурайи Гюльбагьар Исмяилова 2-пи йишван, Табасаран райондин БицIидарин яратмишарин хулаъ аьгъювалар гъадагъурайи Асият Аьдилова 3-пи йишван сагьибар гъахьну.
Аьхюну, 16 йис бегьем хьайиз вуйи, баяр-шубарин дестейиъ гъалибчи Пилигъ СОШ-диъ урхурайи Мансур Мягьямадов гъахьну. 2-пи ва 3-пи пешкешнан йишвар Табасаран райондин гимназияйин вакил Мягьямадяли Мягьямадовди ва БицIидарин яратмишарин хулаъ аьгъювалар гъадагъурайи Аьлим Мягьмудовди гъадагъну.
Аьхюну дестейиъ шубарин арайиъ талитариъ 1-пи йишв Дагъустандин чемпионка, Ягъдигъ гъулан 1-пи нумрайин мектебдиъ урхурайи Мадина Гьясанбеговайи гъазанмиш гъапIну. Кьюбпи йишв Хюрикк гъулан мектебдиъ урхурайи Селимат Мягьямадовайи, шубубпи йишв Гувлигъ гъулан мектебдиъ урхурайи Аьйша Мягьмудовайи гъадагъну.
Талитарин гъалибчйир 29-пи апрели Мягьячгъала шагьриъ гъябгъру республикайин турнириъ иштирак хьиди.
