Умгьанат Сулейманова
Улихьна йигъари, Урусатдин оборонайин министерствойин буйругъниинди, хусуси метлеб айи дявдин операцияйиъ иштирак шулайи Табасаран райондин агьали Мурад Агъасиевдиз «Дявдин женгариъ дирбаш’вал улупбаз лигну» медаль тувну.
Мурад ГьяжитIагьирович Агъасиевди Мурманский областдиъ Североморск шагьриъ ерлемиш дубхьнайи гьюлерин дявдин флотдин частнаъ гъуллугъ апIури, 26 йискьан ву. Вахт гъафиган, думу пенсияйиз удучIвуру, амма жвуван ляхнихьна вуйи ккунивали думу ватандаш уьмриз деетундар – офицери военный гъуллугъ давам гъапIну. 2022-пи йисан сентябрин вазли хусуси метлеб айи дявдин операция кIулиз адабгъбан бадали мобилизация мялум гъапIнийи. Военный гъуллугънан аьхю тажруба айи, гьевес кайи Мурад Агъасиев жвуван хушниинди 2022-пи йисан 17-пи октябриъ СВО-йиъ иштирак хьуз гъягъюру. Сифте ДНР-иъ, хъа гьамусяаьт Харьковский областдиъ гъагъи женгариъ иштирак шули, дугъан магьа 9 ваз ву. Думу жигьил эскрариз мялимси ву: дурариз тажрубалу офицери душмандихьна фициб къайдайиинди багахь духьну ккундуш, фици жвуван хатIасузвал уьбхюб лазим вуш, ктибтури шулу.
«Ватандин Аьхю дявдин йисари рация хьайи йишв ва фуж наан аш, дишла аьгъю шулийи. Хъа гьамус, пуз ккундузуз, женгариз гъягъюрайи эскрарихь телефонар гъитуб гизаф пай командирарин тахсир ву. Гьаз кIурава, гьерхиш, жаваб тувурза – телефондин сигнал гъибисубси, душманди думу терефназди дишла ракета деебтура. Гьамци хайлин ихь эскрар уьмрихъ мягьрум гъахьну. Му жюрейин дюшюшарихьан гизаф жигьилар уьрхюрача», – ктибтнийи узуз Мурад Агъасиевди.
УрчIвуб вазлин арайиъ хусуси метлеб айи дявдин операция-йин женгариъ жвуван уьмриз хатIа кади улупу игитвализ лигну, Мурад Агъасиев шубуб медалиинди лишанлу дапIна. «Эскервалин жюрэтлувализ лигну» I дережайин медаль дугъаз Харковской областдин Купянск шагьур бадали кIули гъушу женгариъ тувну. Хъасин офицериз «Дявдиъ эскрарин дуствал мюгькам апIбаз лигну» ва аьхиримжи йигъари «Дявдин женгариъ дирбаш’вал улупбаз лигну» медалар тувну.
Мурад Агъасиев АхьитI гъулаъ бабкан гъахьну. Дугъан адаш ГьяжитIагьир Жамалутдинович хайлин йисари АхьитI гъулан мектебдиъ мялимди гъилихну. ГьяжитIагьир Жамалутдиновичди ва Муминат Арзумановнайи юкьур риш ва кьюр бай уьлкейиз, жямяаьтдиз хайирлу веледарси тербияламиш гъапIну. ГьяжитIагьир Жамалутдинович кечмиш духьну хьуд-йирхьуд йис дубхьна, амма адашди туву тербияйин натижаси улупуз шулу Мурадли ва дугъу дарсар киву имбу жигьил эскрари гъи Украинайин аьтрафариин улупурайи дирбаш’вал.
Мурадлин уьмрин юлдаш Анжела Наврузялиевна, кьюр гюрчег шубарра аьхю апIури, Мурманскдиъ дуланмиш шули, 25 йискьан ву. Эльвира ва Лаура Санкт-Петербургдиъ университетариъ урхура.
Му читин вахтна ватан уьбхюрайи Мурад Агъасиевдиз ва дугъаз ккилигурайи хизандиз жандин сагъвал ккун апIураза.
