Зубайдат Шябанова
4-пи декабриъ Хючна гъулаъ гимназияйин бинайиин «Мялимдин хъуркьуваларихьан ученикдин хъуркьуваларихьна» темайиан урус чIалнанна литературайин практикайин семинар кIули гъубшну.
Думу серенжем райондин администрацияйин кюмекниинди РД-йин мялимарин ассоциацияйи ва райондин образованиейин управлениейи тешкил гъапIнийи.
Семинариъ районарин мектебарин урус чIал ва литература кивру 95 мялим, образованиейин Управлениейин ва республикайин мялимарин Ассоциацияйин вакилар иштирак гъахьну.
Хялар ва семинариъ иштирак шулайи мялимар Табасаран райондин главайин заместитель Заур Мусаевди къаршуламиш гъапIну. Дугъу райондин мялимариз гьаму жюрейин семинарар гъахуб важиблу вуйиваликан улхури, ОГЭ-йихьна ва ЕГЭ-йихьна урхура-йидар гьязур апIбаъ дурари мялимарин пишекарвалин дережара за апIуз кюмек туврувал къайд гъапIну.
«Учу Табасарандин ругариин учву кьабул апIуз гьязур вуча. Ич мектебарин бинайиин жюрбежюр предметариан семинарар гъахувал аьдат дубхьна. Райондин гимназия гьавайиди кадабгънайиб дар. Му гимназия-йин выпускникари гьар йисан урус чIалнан ЕГЭ заан баллариз тувра.
Къайд апIуз ккундузузки, гъубшу йисан урус чIалнан ЕГЭ-йин натижйириан республикайин I404 мектебдик ич райондин гимназияйи 20-пи йишв гъадабгъна. Му мектебдизси, вари райондизра заан хъуркьувал ву.
Гъийин семинариъ республикайин урус чIал ва литература кивру варитIан ужудар педагогари райондин мялимар ГИА-йихьна урхурайидар гьязур апIбаан чпин аьгъюваларихъди ва тажрубайихъди таниш апIрувалиин ва гележегдиъ ухьу хъана заан хъуркьуваларихъна гъюру кIури умудлу вуза», –гъапнийи Заур Мусаевди.
Семинарин иштиракчйирихьна гьацира республикайин бажаранвалар артмиш апIру «Альтаир» центрин мялим Ирина Билаловара илтIикIну. Дугъу семинар гъабхбан метлебарикан ва гьял апIру месэлйирикан гъапну, 6-пи декабриъ гъябгъру аьхиримжи сочинениейихьна гьязур апIбан къайдйирикан ктибтну. Думу сочинениейин натижйирин ужудар гъахьиштIан, выпускникариз ЕГЭ тувуз ихтияр адар.
Семинарин ляхин 4 секцияйиъ давам гъабхьну. Думу секцйириъ республикайин лицей-интернатдин гъуллугъчи Ирина Билаловайи, РД-йин «РМЛИ ДОД» ГБОУ-йиъ урус чIал ва литература кивру мялим Гьябибат Гьяжимурадовайи, республикайин физикайинна математикайин лицейиъ урус чIал ва литература киврайи мялим Виктория Муртузялиевайи ва Избербаш шагьрин I2-пи нумрайин мектебдин мялим Салигьят Шамхаловайи раондин мялимарихъди ученикар ЕГЭ-йихьна гьязур апIбаан мастер классар кIули гъухну.
