Умгьанат Сулейманова
Игит абайин тербия
Саб кьадар яш гъабхьи спортсменар пенсияйиз гъягъюрайи вахтна, ихь ватанагьли Эмирбег Мягьямедбеговди, чан яшариз дилигди, спортдиз дикъатнаан фикир тувра. Ккудубшу йисан 27-пи декабри Дербент шагьрин депутатарин собраниейин заседаниейиъ, грекаринна римарин кчIихбариан ветеранарин арайиъ вуйи дюн’яйин чемпионатдиъ кемшрин медаль гъазанмиш гъапIу Эмирбег Мягьямедбегов, спорт артмиш апIбан ляхник аьхю пай кивбаз лигну, Дербент шагьрин мэр Рустамбег Пирмягьямедовди гьюрматнан грамотайиинди лишанлу гъапIнийи.
Эмирбег Хайирбегович Мягьямедбегов Табасаран райондиъ СиртIич гъулаъ 1963-пи йисан аьхю албагу хизандиъ бабкан гъахьну. Хизандин кIул Хайирбег Мягьямедбегов Ватандин Аьхю дявдин иштиракчи вуйи. Дяви ккебгъубси, думу Ватан уьбхюз гъушну. Жюрбежюр фронтариъ гъати женгариъ иштирак гъахьну, инсафсузди душмандиз йивури, Берлиндизкьан гъушну ва 1945-пи йисан гъалибвал хьади кьяляхъ гъафну.
Хайирбег Мягьямедбеговди чан хпир Султанагъайихъди 11 жили веледар ва шубур риш аьхю дапIну, дурариз тербия тувну. Гъи дурарикан гьарсарикан уьлкейиз хайирлу касар гъахьну.
«Ич вари чвйирин гъийин хъуркьувалар кIулди адашдин гьунар гъабхьну. Дугъу апIру гьарсаб гаф ва ляхин учуз гъийин уьмриъ аьхю кюмек гъабхьну. Гьаз гъапиш дугъу хьуд йисан Ватанди чан улихь диву вазифйир намуслувалиинди аьхириз тамам гъапIну, хъа дициб дявдин читин рякъ ккадапIу касарин яшайишдин тажруба аьхюб ва кьиматлуб шулу. Гьаци вуйиган гъи учу, дугъан баяр-шубар, худлар-гудлар, дугъхьан насигьят гъадабгъбиин сарра швумал гъахьундарча. Гъи магьа дугъан 4 худли, Украинайиъ гъябгъюрайи хусуси метлеб айи дявдин операцияйиъ иштирак шули, абайин адлу рякъ давам апIура.
Спорт – вари уьмрин аьшкь
1981-пи йисан мектеб ккудубкIу Эмирбег Мягьямедбегов Волгограддиъ гъулан мяишатдин институтдик урхуз кучIвру. Студентди имидитIан вари спортивный нормативар хъайи-хъайибси тамам дапIну, думу Волгограддин гъулан мяишатдин институтдин чемпион гъахьну. 1984-пи йисан, 4-пи курснаъ урхурайи вахтна, думу сабпи ражари СССР-ин гъулан мяишатдин вари институтарин арайиъ гъабхьи чемпионатдиъ иштирак шулу. Гъира Эмирбег Мягьямедбеговди студент вахтари учв аьшкьламиш гъахьи ляхин дипундар. Хайлин йисар гъушнушра, дугъу чан спортдин натижйир анжагъ ужи алаура, иллагьки ветеранарин арайиъ.
Дербент шагьриъ 12-пи мектебдиъ ерлешмиш дубхьнайи ДЮСШ -йиъ тренерди лихурайи Эмирбег, гьар йисан чаз гъюрайи теклифар аьхю хушниинди кьабул апIури, Урусатдин жюрбежюр талитариъ иштирак шула. 2023-пи йисан октябрин вазли Эмирбег Мягьямедбегов Челябинскдиъ Вариурусатдин чемпионатдин кчIихбариъ гъалиб гъахьну, ва думу хъуркьувал чан 60-йисандин юбилейдиз бахш гъапIну. Челябинскдиан гъафир, думу грекаринна римарин кчIихбариан ветеранарин арайиъ вуйи дюн’яйин чемпионатдиъ кемшрин медалин сагьиб шулу.
Гьамусяаьт Эмирбег Мягьямедбегов Дагъустандин грекаринна римарин кчIихбариан ветеранарин командайин капитан ву.
Албагу хизандин эйси
Эмирбег Мягьямедбегов ужуб хизандин кIулра ву. Дугъаз 2 бай ва сар риш а. Аьхюну бай Рамазан хируг ву ва гьамусяаьт Дербент шагьриъ ачмиш дапIнайи хусуси «eLes» клиникайин заведующийди лихура.
Рустамдиъ Мягьячгъалайиъ РД-дин МВД-йиъ тахсиркарваларин экспертиза апIру идарайиъ ляхин апIура.
Риш Рамиля Мягьячгъалайиъ ерлешмиш дубхьнайи И.Ш. Исмяиловдин ччвурнахъ хъайи уларин уьзрарин клиникайиъ уларин духтирди лихура.
Эмирбег Мягьямедбеговдин кьюрид худларра – Рашид ва Гьямид, аьхю абайин рякъ давам апIури, швнуб-сабан Дербент шагьриъ гъягъюрайи кчIихбариъ гъалиб гъахьну.
Эмирбег Мягьямедбеговдин имбу чвйир-чйирикан гьарсар чпикан макьала бикIуз лайикьлу касар ву. Хулаъ бицIидар гизаф а кIури, зарар хьибдар, дурар кчIихузра, улхузра бакар хьиди, кIури шулу ухьухь. Гъи магьа Мягьямедбеговарин хизандиъ саб футболин командайиз инсанар – 10 бай а. Гьелбетда, дурарин арайиъ сар-кьюркьан спортсменар адарди даршул. Дурарикан жаради макьала 22-пи июндиз бикIуз улихьккимиди мясляаьт гъапIунза. Хъа Эмирбег Мягьямедбеговдиз хъанара хъуркьувалар ккун апIураза.
