Гюлягьмад Маллялиев

Табасаран райондин ЧвулатI гъулан агьали Алим Гюлевдиз Москайиъ ВДНХ-йин аьтрафариин кIули гъябгъюрайи «Урусат» выставка-форумдиз дих дапIна. Душваъ ихь ватанагьлийи 10 йигъандин арайиъ – 11-пи ноябриан 21-пи ноябриз – выставкайиз дуфнайидариз экскурсйир гъахиди.

«Выставкайиз ихь уьлкейин вари 89 регионди чпин хусуси павильонариъ аьхиримжи 20 йисандин арайиъ чпи гъазанмиш дапIнайи хъуркьуваларикан хабар тувру шейъар, халкьдин культурайин экспонатар дивна. Йиз вазифа – шу-шубуб дакьикьайин арайиъ
гьарсаб павильондиъ айи хъуркьуваларикан тамашачйириз ктибтуб вуйиз.

Садпи йигъан узу кIул’инди мушваъ лихурайи гидар-экскурсоводариз ва выставкайин администрацияйиз экскурсия гъубхунза, яна дурарин улихь имтигьян тувунза. Йиз экскурсия варидариз кьабул гъабхьнийи, ва дурари йиз ктибтувализ ужуб кьимат тувнийи.
Гьамус йицIуд йигъандин арайиъ, гьар йигъан 2,5 сяаьтдин кьюб-шубуб экскурсйир духну ккунду», – ктибтнийи узуз Алим Гюлевди.

Дупну ккундуки, Алим Гюлев учв филолог ву, хъа аьхиримжи кьюд йисандин арайиъ му багъри Табасарандиъ туристариз экскурсйир гъахуз хъюгъна. Дидланра савайи, туризмйин цирклин таза пишекри онлайн-саягънииндира экскурсйир гъахуру, Табасарандин уткан йишварикан, шаир ва эскер Кьалухъ Мирзайин уьмрикан ктибтура.

«Узу кьюб ражари «Йиз уьлке – йиз Урусат» проектдин экспертра гъахьунзу. Гьаддиз «Урусат – мумкинваларин уьлке» президентдин платформайин администрацияйиъ Москвайиъ гъябгъюрайи выставка-форумдиъ лихуз теклиф гъапIнийзуз», – гъапнийи Алим Гюлевди.