Наргиз Гюлечова

Гьамусяаьт республикайиъ арайиз гъюрайи хьайихъди аьлакьалу кластериз 5 кархана дахил хьиди. Региондин промышленностдинна ариш-веришчивалин министерствойиан туву мялуматриз асас, хьайихъди ляхин апIру кластерин иштиракчйир «Кавказдин хьа», «Омега», «Мажвгларин халачйирин фабрика», «Согратль» агрофирма ва «Ботлихдин халкьдин сяняаьткарвалин фабрика» хьиди.

 

Къайд дапIну ккундуки, дубччну, аьлярхну ва мурсул апIуз гьязур дапIнайи хьа, мурслар ва хьайин мурсларикан дурхну гьязур дапIнайи шей’ар гьясил апIбан бадали, республикайиъ сатIиди вуйи 3 проект юрутмиш апIуз планариъ а. Гьаму йисан хьа гьясил апIурайи республикайин карханйириз региондин бюджетдиан 100 миллион манат пул деебтура. Гьадму дакьатарихъ хьа ва гъидкьар тартиб апIру алатар масу гъадагъиди.

Му месэлайин гьякьнаан Мажвгларин халачйирин фабрикайин директор Расул Гьяжиибрагьимовдихъди сюгьбат гъубхунза. Дугъу туву мялуматариинди, республикайин хьайин кластер РД-йин промышленностдинна ариш-веришчивалин министерствойин жягьтлувалиинди тешкил апIурайиб ву.
«Республикайиъ, хьайин кластер тешкил дапIну, дидин дахилнаъди марччарилан хьа ултIубкъувалилан ккебгъну, дидкан мурсул апIайизкьан вуйи ляхин гъабхру заводар, цехар тикмиш апIуз планламиш дапIна.

Гъийин йигъаз халачйир урхбан бадали ич фабрикайиз мурслар Дербент шагьриан масу гъадагъурача. Му мурслар, Дагъустандиан хьа гъабхури, Москвайиъ гьясил апIурайидар ву. Хъа республикайин промышленностдинна ариш-веришчивалин министерствойин жягьтлувалиинди вуйи проектар уьмриз кечирмиш апIбан кьяляхъ, ихь дишагьлийири региондиъ гьясил гъапIу мурсларин халачйир урхиди кIури, умуд кивраза», – гъапну Мажвгларин халачйирин фабрикайин директори.