Зубайдат Шябанова

 

Табасаран райондиъ 2025-пи йисан ЕГЭ тувуз 380 кас гьисабназ гъадагъна, дурарикан 363 мектеб ккудубкIурайи выпускникар ву. Райондин мектебариъ урхурайидари ЕГЭ Хючна гъулан 1-пи нумрайин лицейин бинайиин гьязур дапIнайи 331-пи пунктнаъ тувди. Гьаму мялуматар улихьна йигъари Табасаран райондин глава Мягьямед Къурбановди райондин образованиейин идарйирин кIулиъ айидарихъди гъубху яркьу совещаниейиъ образованиейин управлениейин начальникдин вазифйир тамам апIурайи Багъиш Аьгьмедовди тувнийи.

Цци райондиъ ОГЭ туврударин кьадар 845 кас ву. Дурари имтигьян Хючна гъулан 1-пи нумрайин лицейиъ, ТIаттил ва Хянягъ гъуларин мектебарин бинайиин гьязур дапIнайи пунктариъ тувди.

2024-2025-пи урхбан йисан райондин мектебариъ урхурайидар жюрбежюр дережйирин олимпиадйириъ иштирак хьпан натижйирикан совещаниейиъ райондин образованиейин управлениейин вакил Зумрият Мягьямедовайи ктибтнийи. Дугъу туву мялуматариинди, гъуларин мектебариъ 24 предметдиан сифтейин этапдин олимпиадйир кIули гъухну, дурариъ 6441 урхурайир иштирак гъахьну. Муниципальный пайназ 7-11-пи классариъ урхурайи 1504 кас удучIвну. Заан классариъ урхурайидарикан 69 касди, жа-жара предметариан гъалибвалин йшвар гъадагъну, хъа 347 касди заан аьгъювалар улупнупешкешнан йишвар гъадагъну.
Олимпиадйириан варитIан заан натижйир улупдар Табасаран райондин гимназияйин, Хючна гъулан 1-пи нумрайин лицейин, Хючна гъулан 2-пи нумрайин, ТIаттил, Ярса, Къужник, Хянягъ гъуларин мектебариъ урхурайидар ву. Республикайин дережайин олимпиадйириъ 16 урхурайир иштирак гъахьну. Дурарикан Альфия Селимовайи (Къужникарин кьялан мектеб), Кезбан Зурфикаровайи (Хянгъярин кьялан мектеб), Маида Пирмягьямедовайи (ГьепIларин кьялан мектеб) ва ФатIима Гьясановайи (райондин гимназия) пешкешнан йишвар гъадагъну.