Зубайдат Шябанова
22-пи майди Табасаран райондиъ «Муниципалитетарин артмиш’вал Дагъустан Республикайин экономика улихь гъябгъювалин заминвал ву» кIуру муниципальный экономикайин форум кIули гъубшну.
Форум РД-йин экономикайин артмиш’валин министерствойи, Табасаран райондин администрацияйи, РД-йин Жямяаьтлугъ палатайи, Дагъустандин гьюкуматдин университетди ва Дагъустандин гьюкуматдин халкьдин мяишатдин университетди тешкил гъапIуб вуйи.
Серенжемдин асас месэлйир ва метлебар – муниципалитетарин аьлакьйир мюгькам апIуб, жюрбежюр цирклариъ дуствалин аьлакьйир йитIуб ва инновацияйин технологйир уьмрин рякъюз кечирмиш апIуб, яшаишдинна экономикайин цирклар артмиш апIру цIийи рякъяр агуб вуйи.
Форумдиъ ДГУ-йин ректор Муртазяли Рабаданов, ДГУНХ-йин ректор Аьгьмед Бучаев, РД-йин Минэкономразвитиейин гъуллугъчи Мурад Мельхашев, РД-йин финансарин министерствойин, РД-йин Жямяаьтлугъ палатайин, Дагъустандин Кьибла мулкарин округдин муниципалитетарин вари администрацйирин вакилар, республикайин вузарин профессорар ва аьлимар иштирак гъахьну.
Серенжем ачмиш апIури Табасаран райондин глава Мягьямед Къурбановди къайд гъапIганси, форум муниципалитетарин идара апIбан тажрубайихъди таниш хьуз гъитру ужуб майдан ву. Гьацира му серенжемди шагьраринна районарин яшайишдинна экономикайин цирклин асас важиблу месэлйирикан республикайин улихь хьайи экономистарин мяналу докладарихъ хъпехъуз ва дурар гьял апIру рякъяр агуз мумкинвал тувра.
Форумдин иштиракчйир райондин бюджетдин месэлйириан, образованиейин гъурулушдин артмиш’валиан, алверчивализ ва бицIи бизнесдиз кюмек тувбаан, социалинна инжинервалин инфраструктура цIийи алапIбаан, гъулариъ деврин демографияйин ва миграцияйин гьяракатарин гьякьнаан, туризмдин артмиш’валин месэлйириан докладарихъ хъпехънийи ва думу терефариан арайиз гъафи месэлйир гьял апIру рякъярикан гъулхнийи.
Форумдин ляхнин натижйириан республикайин муниципалитетарин артмиш’валин теклифар кайи программа тартиб апIиди. Думу программа РД-йин Правительствойихьна ва РД-йин экономикайин артмиш’валин министерствойихьна рубкьиди.
