Наргиз Гюлечова
Гьаму йигъари Табасаран райондин Хючна гъулаъ Кьалухъ Мирзайин ччвурнахъ хъайи спорткомплексдиъ юкьяр дисбаан Табасаран ва Хив районарин, Дербент ва Дагъ.Огни шагьрарин мектебариъ урхурайидарин арайиъ сабпи йишв бадали вуйи ачухъ талитар кIули гъушну. Дурар Табасаран райондин администрацияйи ва райондин 4-пи нумрайин ДЮСШ-дин дирекцияйи Мялимарин йигъаз бахш вуди тешкил гъапIдар вуйи. Талитариъ зиихъ кудухнайи муниципалитетариан 7 йислан 17 йис яш дубхьнайи 150-тIан артухъ спортсменар иштирак гъахьну.
Табасаран райондин 4-пи нумрайин ДЮСШ-дин кIулиъ айи Мартин Сефербеговди газатдиз туву мялуматариинди, талитар гъахбан асас метлеб аргъаж шулайи наслин арайиъ сагъу уьмур хъапIбахьна иштагь артухъ апIуб ва юкьяр дисбан спорт яркьуди тарабгъуб вуйи.
Къайд апIуб лазим вуки, райондиъ жигьилар гизафси маракьлу духьнайи спорт – юкьяр дисбан спорт ву. Гьаддиз му йигъан бицIидарин ва живанарин арайиъ вуйи талитариз лигуз дуфнайи инсанарин кьадарра лап аьхюб вуйи.
Талитар олимпиадайин къайдайиинди кIули гъушнийи – гъалиб гъахьир гъюру ражну цIиб гъужлирихъди кчIихбариз удучIвуйи. Талитар гъахуз пулин дакьатариинди кюмек туву республикайин Халкьдин Собраниейин депутат Имран Аваевдин гафариинди, турнириъ иштирак шулайи спортсменар вари ужуди гьязур духьнайидар вуйи.
Тешкилатчйири турнирин гъалибчйириз медалар, спортдин кубкйир, грамотйир ва пулин пешкешар тувнийи. Хусуси пешкешариинди кчIихбаан варитIан ужуб техника улупдар – Валид Рашидов ва Гьяжимурад Къурбанов, гъалиб хьпахьна улупу гьевесназ лигну Амир Асланов, Жабряил Сулейманов, Муслим Нуров ва Шихгьяйдар Шихов, хъа гьацира жигьил спортсменар талитарихьна ужуди гьязур гъапIу тренер ТIагьир Нуров лишанлу гъапIну.
Хъа кIулди командйирин натижйирикан кIуруш, 1-пи йишван сагьиб Табасаран райондин команда гъабхьну, 2-пи йишв Хив райондин командайи, 3-пи йишв Дагъустандин Огни шагьрин командайи гъазанмиш гъапIну.
Узуз жаради ТIагьир Нуровдин регьберваликкди юкьяр дисбаан спортдиин машгъул духьнайи НичIрас гъул’ан вуйи кьюр чве – 10 йисандин яшариъ айи Надим ва 9 йис дубхьнайи Ибрагьим Хайирбеговар къайд апIуз ккундузуз. Чан гъагъишнан категорияйиъ Ибрагьим 1-пи йишван сагьиб гъахьну, хъа Надимди 3-пи йишв гъадабгъну. Кьюбридра пешкешариинди лишанлу гъапIну.
