Зубайдат Шябанова

Чухсагъулин кагъаз

Улихьнаси Табасаран райондин глава Мягьямед Къурбановдин ччвурнахъ ихь эскрариз чухсагъул мялум апIурайи нубатнан кагъаз гъафну. Му ражари думу дявдин мотострелковый полкнан 78979-пи частнан командир, подполковник А.Наливакиндихьан вуйи.
Му частнаъ хусуси метлеб айи дявдин операцияйиз чан хушниинди гъушу Хючна гъулан вакил, Табасаран райондин администрацияйин гъуллугъчи Заур Абдуризакьовди гъуллугъ гъабхура.
«Аьбдуризакьов Заур Шарафудиновичди ДНР-ин ва ЛНР-ин ругариин гъахурайи дявдин операцйириъ, гьацира Курский областдиъ контртеррорин гьяракатариъ, Ватандин маракьар уьрхюри, чан улихь дивнайи буржи заан дережайиъди тамам апIура, жвув намуслу ватанперверси ва игитси улупура», – дибикIна кагъзиъ.
Частнан командири Заур Аьбдуризакьовдин ужуб гъиллигъ ва янашмиш’вал мисалназ хури, вари райондиъ жигьиларихъди ватанпервер тербияйин ляхин гужлиди тешуил дапIнайиваликан кIурайи.
«Табасаран райондин агъзурихьна жигьиларси, райондин администрацияйин швнур-сар кас, гьадму гьисабнаан Заур Аьбдуризакьовра, хусуси метлеб айи дявдин операцияйиз ватандин маракьар уьрхюз чпин хушниинди гъушну. Ва дурари гъуллугъ гъабхурайи частариан ухьуз гъюрайи баркаллувалин кагъзариинди табасарандин жилариин игит ва лайикьлу эскрар тербияламиш шулайивал тасдикь шула», – гъапнийи Мягьямед Къурбановди.

Ургуб гъулаъ ядиграр

28-пи январиъ Табасаран райондин администрацияйиъ Гъалибвалин йигъан гъахру серенжемар тешкил апIру комитетдин сабпи заседание гъабхьну.
Мялум вуйиганси, цци, Ватан уьбхрурин йисан, Ватандин Аьхю дяви ккудубкIну 80 йис къайд апIуру.
Комитетдин председатель, Табасаран райондин глава Мягьямед Къурбановди заседаниейиъ Дагъустандин глава Сергей Меликовдин табшуругъниинди, район иштирак духьну ккуни вари серенжемар, акцйир, конкурсар, конференцйир ктухну. Дурар КIваин уьрхбан вахта, Гъалибвалин пайдагъ, Георгиевский лента, Гъалибвалин цал, Гъалибвалин багъ, Гъалибвалин диктант, Гъалибвалин унчIв, Жягьтлувалин дарсар, литературайин мажлисар ва хайлин жара серенжемар ву.
«Му махлукьатлу серенжемариъ вари район иштирак духьну кунду. Вари дюн’яйин тарихдиъ важиблу роль гъибтнайи му машквран аьхю мяналувал гьарсар касди гьисс дапIну ккунду», – гъапнийи главайи.
Заседаниейин дахилнаъли райондин главайи 9-пи майди парад гъябгъру Хючна гъулан асас кючйир къайдайиз духну ккуниваликан гъапнийи. Дурар Больничная, Къурбановдин ччвурнахъ хъайи, Уьсмановдин ччвурнахъ хъайи ва Гьясанбеговдин ччвурнахъ хъайи кючйир ву. Му месэлайин гьякьнаан главайи Хючна гъулан сельсоветдин кIулиъ айи Гъурхмаз Аьбдуризакьовдиз кьатI’и табшуругъар тувну.
Мягьямед Къурбановди эскрарин ядиграр цIийи алаъбан ва дицисдар гюмбетар райондин 7 гъулаъсана дивбан месэлара гъитIибкIну. Заседаниейиъ Лижва, ЦIанитIил, Ругуж, Гъулли, Хьарагъ, Кьюракк, Вечрикк гъуларикан улхуб гъябгъюрайи.
Мидланра гъайри, машкврарин дахилнаъди вари район вуйибси хусуси метлеб айи дявдин операцияйиъ гъийиху эскрарин шиклар кайи баннерар цIийи алауру.

Дявдин насил

Ватандин Гъалибвалин 80 йисаз Табасаран райондиъ «Дявдин бицIидар» совет абццди.
Табасаран райондин главайин табшуругъниинди, райондиъ Ватандин Аьхю дявдин Гъалибвализ бахш вуди гъахру вари серенжемариъ ТОКС-дин вакилар, юнармейцйир, волонтерар, «Сарпидарин гьяракат», «Бабарин кьувват», «Ватан уьбхрударин фонд» ва жара тешкилатар иштирак шулу.
Му тешкилатарилан гъайри, райондиъ «Дявдин бицIидар» советра абццди. Юбилейин серенжемар тешкил апIбаъ ва гъахбаъ цIийи советра иштирак хьибди.