Гюльнара Мягьямедова
10-пи октябриъ Дагъустандин Правительствойин председатель Аьбдулмуслим Аьбдулмуслимовди Табасаран райондин глава Мягьямед Къурбановдихъди гюрюш кIулиъ гъубхну.

 

Гюрюшдиъ муниципалитетдин яша-йишдинна экономикайин артмиш’валин месэлйир за гъапIнийи. Гьацира дурари аьхиримжи йисан райондиъ дапIнайи ляхнарикан гъулхнийи. Муниципалитетдин кIулиъ айири рес-публикайин правительствойин терефнаан асас фикир лазим вуйи месэлйир гъитIирккнийи – район штухъди тямин апIбан, гъулариъ даргъру гьялнахъна дуфнайи мектебарин ерина цIийидар тикмиш апIбан, образова-ниейин идарйириъ расвалин ляхнар гъахбан, рякъярин аьгьвалат къайдайиз хувалин ва гь.ж..
Мягьямед Къурбановдин докладдихъ хъебехъну, РД-йин Правительствойин председатели райондиъ дапIнайи ляхниз заан кьимат дивну ва муниципалитетдиъ гьял апIуз удукьури адру месэлйириз кюмек тувуз гаф тувну.

Учу, «Табасарандин нурар» газатдин журналистари, райондин кьюб гъулаъ – Гюгьрягъ ва Акъаъ – мектебар хусуси хулариъ ерлемиш духьнайивалин месэла кми-кмиди тялукь гьякимарихъди вуйи серенжемариъ гъитIибккури шулча. Аьбдулмуслим Аьбдулмуслимовдихъди вуйи гюрюшдиъ гьадму месэлйирин гьякьнаан фициб жаваб гъабхьнуш, чан фикрар ачухъ апIуб ккун апIури, узу Табасаран райондин глава Мягьямед Къурбановдихьнара илтIикIунза.

«Гьелбетда, гьадму месэлйирра гъитIирккунча. Ухьуз мялум вуйиси, Гюгьрягъ мектеб тикмиш апIуз проект-динна сметайин вари документар гьязурди а. Госэкспертизайиз документар тувна, экспертарин ужуб кьимат лазим ву. Госэкспертиза апIбан бадали, пулин дакьатарра ккунду, гьаддин гьякьнаан пул деебтбан бадали, Аьбдулмуслим Аьбдулмуслимовди лазим вуйи идар-йириз табшуругъар тувнийи.

Хъа Акъ’арин мектебдин гьякьнаан улхуруш, душваъ мектеб дивуз проектдин документар цIийи алаъну, гьаму йисан пулин дакьатар адрувалра гьисабназ гъадабгъну, 2024-пи йисан проектированиейиз тувбан гьякьнаан йикьрар гъапIунча», – гъапнийи Мягьямед Къурбановди.