Наргиз Гюлечова
Улихьна йигъари Мягьячгъалайиъ ерлешмиш дубхьнайи «Саб вуйи Урусат» партияйин жямяаьтлугъди кюмек тувбан штабдиъ «Муниципалитетдин йигъ» кIуру проектдин дахилнаъди Табасаран райондин йигъ къайд гъапIну.
Табасаран район му штабдиъ йигъ къайд гъапIу муниципалитетарикан шубубпи район ву, ва серенжемдиз, райондин администрацияйин вакиларси, гьюрматлу хяларра уч гъахьнийи – республикайин Халкьдин Собраниейиъ Дагъустандин Главайин вари ихтиярар айи вакил Нюсрет Уьмаров, РД-йин Халкьдин Собраниейин депутатар Алавудин Мирзабалаев ва Сефер Аьлиев, табасаран аьлимар, жямяаьтлугъ касар, студентар ва гь.ж.
Серенжемдиз гъюрайи хялар райондин культурайин управлениейин гъуллугъчйири табасаран халкьдин мукьмарихъди къаршуламиш апIурайи, хъа штабдин айвандикк йишв кIуруш, халкьдин сяняаьткарваларин шей’арихьди албагнайи; райондин кьялан библиотекайин къурулушдин ва культурайин управлениейин пишекрари фици халачи убхуруш, гакIвликайин вуйи муччврар фици апIуруш, уч духьнайидариз мастер-класс улупнийи.
Къайд апIуб лазим вуки, цIиб улихьнаси «Саб вуйи Урусат» партияйин табшуругъниинди Дагъустандин муниципалитетариъ табиаьтдин марццишин уьбхбан серенжемар рес-публикайин муниципалитетарикан варитIан ужуди Табасаран районди кIули гъухнийи, гьаддиз, мяракайин асас пай ккебгъайиз улихьна, марццишнан декадайиъ иштирак хьпаз лигну, райондин администрацияйин вакилариз – Рафик Аьлиевдиз, Яшар Аьбдуловдиз ва Эльмира Рамазановайиз – штабдин терефнаан чухсагъулин кагъзар тувну. Мягьямед Къурбановдизра, Табасаран район штабдин ляхнариъ жанлуди иштирак хьпаз лигну, чухсагъулин кагъаз тувну ва Дагъустандин Уьру китаб бахш гъапIну.
Серенжемдин эвелиъ уч духьнайидариз уччвуб табиаьт хъайи, туристар гъюру ужудар йишвар ва аьхю тарихнан Ургур чвчучвунна сар чучун гъала айи Табасаран райондикан вуйи ролик улупнийи.
Гьюрматлу хялари, удучIвну улхури, Табасаран район му йигъахъди тебрик гъапIнийи. Райондин яшайишдинна экономикайин артмиш’валикан доклад ТинтIарин гъулан поселениейин глава Хизритдин Сяидягьмедовди гъурхнийи. Чан докладдиъ дугъу асас фикир гъийин йигъаз хусуси метлеб айи дявдин операцияйиъ иштирак шулайи ва шули гъахьи Табасаран райондиан вуйи эскрариз тувнийи ва дурарин гьунарарикан ктибтнийи. Дугъан гафариинди, гъийин йигъаз 7 агъзуртIан артухъ райондин агьалйир хусуси метлеб айи дявдин операцияйиъ иштирак духьна. Гьадрарикан 100-дихьнакьан эскрари Ватан бадали чпин жанар фида гъапIну, хъа табасаран миллетдикан вуйи 3 кас – Эседулла Абачев, Руслан Къурбанов ва Исрафил Мягьямедов (йикIбан кьяляхъ) Урусатдин Игитар гъахьну.
Райондин глава Мягьямед Къурбановди чан терефнаан уч духьнайидариз чухсагъул гъапнийи ва 21-пи сентябри къайд апIуз планламиш апIнайи Табасаран райондин 95 йисандин юбилейиз варидариз теклиф гъапIнийи.
Мярака ихь халкьдин мяълийирин устадар вуйи Арсен Аслановди ва Седеф Рашидовайи мяълийир апIбиинди, табасаран драмтеатрин актер Ризван Аскеровди «Гъала» спектаклиан вуйи кьатI – Рустам-Кьадийин монолог – урхбинди давам гъабхьнийи.
Серенжем ккудубкIиган, аьдат вуйиганси, мина уч духьнайи вари хялар табасаранарин милли хурагарихъди албагнайи устларихъ дитну.
