Зубайдат Шябанова

Табасаран райондиъ муниципалитетдин 95 йис хьпахъди аьлакьалу юбилей къайд апIбан серенжемарихьна гъизгъинди гьязур шула. Райондин кIулиъ айи Мягьямед Къурбановди юбилей къайд апIбан серенжемар гьязур апIурайи тешкиллувалин комитетдин вакиларихъди саки гьар гьафтайи заседанйир гъахури, улихь хьайи месэлйир гьял апIури гъахьну.

 

Аьхиримжи заседаниейиъра иштиракчйири серенжемарин программайикан ва дидин кIалибнакан, гъюрайи машквран асас мэселйирикан гъулхну.

Райондин глава Мягьямед Къурба-новди, тешкиллувалин комитетдин вакиларихьна илтIикIури, планламиш дапIнайи гьарсаб серенжем заан дережайиинди кIули дубхну ккуниваликан гъапну. Заседаниейиъ дугъу жавабдар касариз аьлава табшуругъар тувнийи. Дурар райондин уьмуми субботник гъабхбахъди, гьюрматлу хялар кьабул апIбахъди, гъала машквраз ккабалгбахъди (гъуларин поселенйириз милли майднар ккатIарццуз, халкьдин художествойин сяняаьткарвалин выставкйир гъахуз йишвар гьязур апIуб), серенжемар гъахру вахтна агьалйирин хатIасузвал тямин апIбахъди аьлакьалу вуйи.
Юбилейин серенжемар 21-пи сентябриъ Хючна гъулаъ Ургур чвуччвунна сар чуччун гъалайиин гъягъиди. Гъалайин аьтрафариин райондин гъуларин поселенйирин 12 милли майдан ккатIабцциди, выставкйир ва ярмаркйир тешкил апIиди, райондин агьалйириз гьюкуматдин пешкешар тувди.

Гьадму йигъан райондиъ республикайин халкьдин яратмишарин «Рубасдин мукьмар» фестивалра гъябгъиди. Дидин дахилнаъди республикайин районарин халкьдин яратмишарин милли коллективари ва машгьур артистари чпин устадвал улупиди.