Умганат Сулейманова
Хьадан кIулариъ табасаран театрин труппа Башкортостан Республикайиъ гастролариъ гъабхьну. Му ляхин Урусатдин культурайи министерствойин «Аьхю гастролар» кIуру программайин дахилнаъди тешкил дапIнайиб вуйи.
Гастроларин садпи йигъан театри А. Мубараковдин чвурнахъ хъайи Гьюкуматдин башкирияйин драмайин сибай театрин сягьнайиин «Сижар» спектакль улупну. Дупну ккундуки, спектаклиз театрин тамашачйир деъру залиъ саб йишвкьан имдарди, билетар масу гъадагънайи. Табасаран театрин гьарсаб спектаклиз башкир тамашачйир гьаци уч шули гъахьну. Спектакль ккебгъайиз, табасаран театрин директор Аьлимурад Аьлимурадовди, Дагъустандин культурайин министр Зарема Бутаевайин ва табасаран театрин вари коллективдин терефнаан, гьамциб гьюрматниинди табасаран театр кьабул апIувализ, Башкирияйин культурайин министерствойиз ва Сибай театрин кIулиъ айидариз ва тамашачйириз аьхю чухсагъул мялум гъапIну. Гьацира дугъу кьюб театри чпин халкьарин культура сар-сарихьна хьади гъягъбан аьхю важиблуваликанра гъапну.
Табасаран театри Башкирияйиз, аьхю тамашачйириз вуйи спектаклйирихъди сабси, бицIидариз вуйи спектакль-махъвра хьади гъафну. Гьаци, гастроларин кьюд кIуру йигъан театрин артистари башкир бицIидариз «Аьламатнан баб» кIуру спектакль-махъв улупну. БицIидариз вуйи гьаму спектакль дина гъабхбан метлеб жара миллетдин бицIидар ихь мукьмарихъди ва ялхъвнарихъди, ихь халкьдиз хас вуйи жюрбежюр гьадисйирихъди таниш апIуб вуйи. Хъа «Аьламатнан баб» табасаран авторин пьесайин бинайиинди табасаран композитори мукьмар дидикIну, дивнайиб ву.
Гастроларин шубудпи йигъан табасаран театр башкир тамашачйирихъди «Лику машквар» спектакль улупури гюрюшмиш гъахьну. Дупну ккундуки, гастролариъ улупу вари спектаклйир дивур табасаран театрин кIулин режиссер, Дагъустандин искусствйирин лайикьлу гъуллугъчи Жанбулат Гьябибов ву. «Лику машквар» спектакль Вариурусатдин «Сабвуйи Урусат» партияйин «БицIи Ватандин культура» кIуру проект уьмриз кечирмиш апIбан программайиинди дивнайиб ву.
Шубудпи йигъан, спектакль улупбалан кьяляхъ, Сибай шагьрин культурайин управлениейин начальникди табасаран театрин коллективдиз чпин шагьрин аьхюрин терефнаан Чухсагъулин кагъаз, хъа вари коллективдиз гьюрматнан пешкешар тувну.
Шубуд йигъандин арайиъ башкир тамашачйири табасаран театрин спектаклйир аьхю гьюрматниинди кьабул гъапIну, гьарсаб спектакль ккудубкIбалан кьяляхъ артистар сягьнайилан гурлу гарччлариинди гьаъри гъахьну. Башкортостан Республикайиъ табасаран театрин гастролар гизаф маракьлудар ва мянфяаьтлудар гъахьну. Спектаклйир улупбалан кьяляхъ, юкьудпи йигъан табасаран театрин труппа Уфа шагьриъ, «Шульган-таш» кIуру табиаьтдин заповедникдиъ ва жара йишвариъ, Сибай шагьрин театрин коллективди чпин хялариз гьязур дапIнайи культурайин аьхю программайихъди таниш гъахьнийи.
«Урусатдин культурайин министерствойин «Аьхю гастролар» кIуру программайиъ иштирак шули ихь театрин кьюдпи йис ву. Министерствойин терефнаан театрин коллективдиз рякъюз билетар гъадагъуз ва декорацйир гъахуз кюмек тувра. Имбу вари харжар театри чав гъазанмиш апIурайи дакьатарикан ахьра. Сач учу Татарстандиз гастролариз гъушунча, гележегдиъ ихь гьюкуматдин жара республикйиризра гъягъюр кIури, умуд киврача. Хъа цци, октябрин вазли, учуз жаваб вуди, Дербентдиз хяларди Башкирийиан Сибай театр гастролариз гъиди. «Аьхю гастролар» программайиъ иштирак шулайивали учуз ихь халкьдин культура жара миллетарин тамашачйириз улупуз, дурарин культурайихъди таниш хьуз мумкинвал тувра. Артистарин арайиъ цIийи таниш’валар, дуствалар шула. Гьаддиз гъи узу Дагъустандинра, Урусатдинра культурайин министерствйириз аьхю чухсагъул кIураза», – гъапну табасаран театрин директор Аьлимурад Аьлимурадовди.
