Зубайдат Шябанова
Гьаму йигъари РД-йин жигьиларин ляхнариз лигру министерствойиъ дидин кIулиъ айи министр Камил Саидов Табасаран райондин глава Мягьямед Къурбановдихъди гюрюшмиш гъахьну. Мягьямед Къурбановди министр туристаринна ватанпервервалин «Табасаран» центрин проектдихъди таниш гъапIну. Улихьнаси думу проект республикайин кIулиъ айидариз ва Росмолодеждин регьбрариз кьабул гъабхьнийи.
Багарихьди абццуз планарик кипнайи центриъ республикайин ва вари Урусатдин мяна айи аьхю серенжемар гъахиди. Центриъ яшамиш шлу хуларилан гъайри, столовая ва 3,5 га жилиин ккергъбан военный гьязурвалар гъахру майдан (плац) ва манигъвалар айи зул ачмиш апIуз планарик ка. Мушваъ гьацира рягьятвал гъадабгъбан инфраструктурайин проектра тартиб дапIна. Дурарин гьисабнаъ глэмпинг-центр, форумар гъахру чадрар, амфитеатр, хяларин хулар а. Гьацира футболин ва жара майднар арццди.
«Муниципалитетдин терефнаан ихь жигьиларин гележегдин артмиш’вализ му кьюбпи маракьлу проект ву. Учу думу ляхник кипру рякъяр агурча. Ихь жигьилар артмиш’валин ва рягьятвал гъадабгъбан терефариан заан мумкинвалариз лайикьлудар ву», – гъапнийи Камил Саидовди.
Ич сюгьбатнаъ райондин глава Мягьямед Къурбановди къайд гъапIганси, му проект уьмрин гьяятназ адабгъбан бадали «Жигьилариз вуйи регион» программайиъ иштирак дубхьну ккунду. Думу программайиз гьамусяаьт заявка гьязур апIура.
«Саб терефнаан, центр жигьиларин лагерь гьисаб шулу, фицики душваъ сабпи нубатнаъди жигьиларин ва аргъаж шулайи наслин ватанпервер тербияйиз фикир тувру. Душваъ суткйириинди хусуси метлеб айи дявдин операцияйиъ иштирак шулайи эскрарин бицIидари рягьятвал гъадабгъиди. Гьамусяаьт Табасаран райондиан 4 агъзуртIан артухъ жигьилар хусуси метлеб айи дявдин операцияйиъ иштирак шула. Гьаддиз учуз дурарин веледариз ва хизанариз вари терефариан кюмек тувбан ляхин лап важиблу вучуз. Мидланра гъайри, думу центр туристаринубра хьибди, фицики Кьибла Дагъустандиъ Дербентдин кьяляхъ машгьур ва туристарин варитIан ккуни йишв Табасаран район ву. Центр ихь жигьилариз тербия ва рягьятвал гъадабгъру гьаму деврин цIийи майдан хьибди», – гъапнийи Мягьямед Къурбановди.
Центр 2027-пи йисан абццуз планарик ка.
