Зубайдат Шябанова
Гьюрматлу ватанагьлийир! Гъи, гьялаки нириз ухшар вуди дигиш шулайи девриз, вари уьлке вуйибси тарабгънайи цивилизацияйиз, сабра чпихъ хъуркьуз гъидритди артмиш шулайи цIийи технологйириз ва гъи-закур йихрудар ву, кIуру жюрейин улхбариз дилигди, улихь деврариъси гьамусра газатар ва журналар чапдиан удучIвура. Газат инсанарин хлиз гъюри амиди, думу чIивиди гъубзди. Ихь арайиъ багъри газатдин артмиш’валикан гъайгъушин гьисс апIурайи ватандашарси, думу хили дибисну гьарсаб макьала урхуз аьшкьлуди ккилигурайидарра гизаф а. Гьаддиз учуз газатдихьна мани рафтар айи гьарсар ихь ватандашдихъди таниш хьуз ва дугъаз чухсагъул пуз ккундучуз.
Гирами юлдшар! Учу газатдикан вуйи ичв фикрариз ва «Табасарандин нурар» газат урхурайи ватандашарин шиклариз майдан абццрача.
Гьаму шиклик учвуз рякъюрайидар Табасаран райондин модельный библиотекайин гъуллугъчйир: комплектованиейин отделин заведующий Гюлишан Шихягьмедова, гьадму отделин библиотекарь Асият Аьбдулкеримова, библиографияйин отделин библиотекарь Альбина Абаева ва методический отделин гъуллугъчи Назиле Къурбанова ву. Дурар «Табасарандин нурар» газатдин цIийи нумрайик кайи мялуматарихъди таниш шула.
«Табасарандин нурар» газат библиотекайиз гъюру агьалйири аьхю аьшкьниинди урхури шулу. Фицики, гьяфта ккебгъну-ктабхъайиз китабар урхру залиъ му газат инсанарин хилиъ рябкъюру. Саб фициб-вуш макьала лазим вуди, агьли касар, мялимар вая мектебдиъ урхурайидар кми-кмиди «Табасарандин нурар» газат гьерхри гъюру. Саб гафниинди, газат лап кьабулди ву. Мидланра гъайри, библиотекайиъ гьар гьяфтайиъ совещанйир вая политинформацйирин серенжемар шулич. Библиотекайин кIулиъ айи Рафик Аьлиевди ихь республикайиъ фу хабар аш, «Табасарандин нурар» газатдиъ фицдар хабрар ва мялуматар тувнаш, учухьди ахтармиш апIуз гъитру. Фицики, деврин библиотекариз вари хабрар аьгъяди ккунду. Вари коллектив сатIиди деъну республикайиъ, райондиъ, уьлкейиъ ва вари дюньяйиъ фу хабрар аш, дурарикан газатдик фицдар тувнаш, гьял апIурча. Гизафси учу СВО-йин темайиз фикир туврача. Газатдиъ улихьнаси удубчIву Зубайдат Шябановайин «Зав’ан кьяляхъ дарфи люкь» кIуру макьала ишури гъурхунча. Дидиъ гьадмукьан хъайи-хъайибси жигьил эскрин ва адашдин дирбаш’валар ва игитвал улупна. Думу ихь халкьдин уьмур ву. СВО-йин тема ухьуз варитIан гъагъиб ва учIруб вухьуз. Гьаз гъапиш дина саки гьарсарин хизандиан баяр душна. Му цирклиан «Табасарандин нурар» газатди гьарсаб нумрайиъ мялуматар тувра.
«Узуз подпискайин вахт ккебгънайиган, йиз ватандашарихьна илтIикIуз ккундузуз. Гьюрматлу урхурайидар, райондин агьалйир. Багъри «Табасарандин нурар» газатдиз подписка апIурхьа. Думу гизаф маракьлу газат ву. Дидиъ ихь райондин, республикайин хабрарихъди таниш хьуз шулу», — гъапну Гюлишан Шихягьмедовайи.
