Зубайдат Шябанова

Гьаму йигъари гъабхьи Варирусатдин культурайинна образованиейин «Искусствйирин йишв» акцияйиъ Дагъустанра иштирак гъабхьну.

Республикайин музеярин залариъ экскурсйир гъухну. Хъа халкьдин устадари хялариз мастер-классар улупну ва халкьдин художествойин антIикьа, чпиз барабар адру сяняаьткарвалар хилариинди фици арайиз хури гъахьнуш, дурар таниш гъапIну. Акцияйиъ бицIидарилан яшлуйириинакьан хайлин ватанагьлийир иштирак гъахьнийи. Республикайин театрариъ тамашичйир бабан чIалариинди вуйи спектаклйириз гъилигну, классикайин ва халкьдин милли мукьмарихъ хъпехъну.

«НивкIвсуз» культурайин йишван му акция республикайин хайлин муниципалитетариъра кIули гъубшнийи.

«Акция гьяракатнаъ ипу 2013-пи йисхъанмина диди вари уьлкейиъ культурайин важиблу серенжемарин сиягьдиъ чан лайикьлу йишв гъибисну. Шад апIурайиб гьадму вуки, ихь республикайиъра думу серенжем машгьур гъабхьну. «Искусствйирин йишвандин» хялар асас вуди жигьилар ва бицIидар шула. Акцияйихьна мициб маракьлувал айивали гьевесламиш апIуру. Мушваъ гьадму гьякьикьатдиз тялукь вуйи саламатвалин ва уж’валин мани гьава а. Культурайин идарйириз хябяхъган кьанди гъюрайивали искусствйирихьна вуйи ихь гьиссар хъана гужал ва мюгькам хьуз гъитра», – гъапну РД-йин культурайин министр Зарема Бутаевайи.