Умгьанат Сулейманова
12-пи июнди Дагъустандин Огни шагьриъ Урусатдин йигъаз ва Урусатдин Игит генерал-лейтенант Эседуллагьа Абачев бабкан гъахьи йигъаз бахш дапIнайи волейболин талитар кIули гъушну. Серенжем тешкил гъапIур Дагъустандин Огни шагьрин кIулиъ айи Замир Гьяжимурадов вуйи.
Талитариъ Дагъустандин Огни, Дербент, Каспийск шагьрариан ва Хив, Табасаран, Дакъузпара районариан 6 команда иштирак гъахьну. Турнир ачмиш апIбан серенжемдиъ Дагъустандин главайи РД-йин Халкьдин Собраниейиъ вари ихтиярар айи вакил Нюсрет Уьмаров, РД-йин Халкьдин Собраниейин депутатар Алавудин Мирзабалаев ва Сефер Аьлиев, Табасаран райондин глава Мягьямед Къурбанов, Хив райондин глава Ярмет Ярметов ва гьацира волейболиин юкIв алидар иштирак гъахьну.
Серенжем ачмиш апIури, Замир Гьяжимурадовди турнирин иштиракчйириз хъуркьувалар ккун гъапIнийи. Дугъу генерал-лейтенант Эседуллагь Абачевдин адресназра хайлин мани гафар гъапнийи.
Иштаракчйирин арайиъ волейболин талитар, гъалибвал гъазанмиш апIбак умуд кади, лап гьевесниинди кIули гъушну. Спортдин гъизгъин женг натижайиъ Дагъустандин Огни шагьрин волейболин командайи сабпи йишв гъадабгъну, кьюбпи йишв Табасаран райондиз, шубубпи йишв Хив райондиз гъабхьну. Гъалиб гъахьи ва савкьатнан йишвар гъазанмиш гъапIу командйир медалариинди, грамотйириинди ва кьиматлу пешкешариинди лишанлу гъапIну.
Дагъустандин Огни шагьрин волейболин командайин кIулиъ айи Насим Сеидов Мягьячгъалайиъ ДГПУ-йин физкультурный факультет ккудубкIну, 2001-пи йисхъанмина жюрбежюр спортдин мектебариъ тренерди лихура. Дугъу тешкил дапIну вердиш гъапIу командайи йисариинди гъизигу зегьметну ужуб бегьер гъабхну.
Ич сюгьбатнаъ Насим Сеидовди чав фици гъалибчи команда яратмиш гъапIнуш ктибтнийи.
– Ич команда 6 касдикан ибарат вуйи. Дурар 30-40 яш дубхьну айидар ву. Учухъди сабси волейболин командайиъ иштирак гъахьи ва гьелелиг мектебариъ урхурайи жигьилариканра сакьюдар гафар пуз ккундузуз. Турнир шлуб аьгъяди, 10-пи ва 11-пи классариан вуйи, волейболихъ юкIв хъайи жигьиларра жалб дапIну, узу дурар лап ужуди гьязур гъапIунза. Дурар жадари ктухурза: 3-пи нумрайин мектебдин – Шамиль Мягьямедов (10 пи класс) ва Алан Шамилов (11-пи класс); 2 пи нумрайин мектебдин вакилар – Адам Насиров (11-пи класс) ва Саид Ризаев (11-пи класс); 5-пи нумрайин мектебдиан вуйи Гьюсейн Аьлимягьямадов (10-пи класс)».
Талитариз лигуз дуфнайи тамашачйириз му йигъан спортдин серенжем кIваантIан кьабул гъабхьнийи.
