Наврузбег Керимов
Сяидялиев Аким Аьбдуризаевич Гьюкуматдин табасаран драмтеатрин варидариз таниш актер ву. Аьхиримжи йисари дугъу, сягьнайиин чан актервалин устадвалра улупбахъди сабси, социальный сетариъ, шиърар, дургъунагъар урхура, блогервалин пишейиъра машгьур духьна.
Аким Сяидялиев Табасаран райондин ТIюрягъ гъулаъ 1997-пи йисан бабкан гъахьну. Думу мектебдиъ урхури имидитIан актервалин бажаранвал кайир вуйи. Аким аьхю абйирин айтуйиъ дупнайи «муртдиъ имиди цIивар апIрударикан» ву. Саб ражари мектебдиъ шулайи шадлугънан мяракайиъ мялимари Акимдиз, мультфильмдикан саб бицIи сценарий кадабгъну, душваъ роль уйнамиш апIуз теклиф гъапIнийи. 6-пи классдиъ урхурайи Акимди чан бицIи яшназ дилигди, спектаклиъ шулайи гьядиса гъякьикьатдиъ гъабшибси улупну, тамашачйир чахъ хъугъуз гъитнийи. Гьаддихъан мялимари, Акимдик актервалин бажаранвал кайиб аьгъю дубхьну, дугъахъ ул хъипнийи. Белки баликан саб вахтна артист шул, гъит дугъан уьмрин рякъ ягъурлуб ибшри дупну, дугъан бажаранвал артмиш апIуз кюмек туври гъахьну.
9-пи класс ккудубкIну Аким Сяидялиев Мягьячгъалайиъ Барият Мурадовайин ччвурнахъ хъайи Дагъустандин культурайин ва искусствойин колледждин театрин отделениейик урхуз кучIвру. 2018-пи йисан шубубпи курснаъ урхурайи Акимдиз Табасаран драмтеатрин кIулин режиссер Жамбулат Гьябибовди «Ургур чвччвун ва сар чуччун гъала» спектаклиъ иштирак хьуз теклиф апIуру. Дугъу чан пишекарвалин сабпи гамар ургур чвуччвун бицIину гъардаш Кьасумрин роль устадвалиинди уйнамиш апIбиинди алдагъну. Му спектаклиъ дугъан актервалин бажаранвал ашкар шулу, ва табасаран драмтеатрин директор Аьлимурад Аьлимурадовди ва режиссер Жамбулат Гьябибовди жигьил студент Аким Сяидялиев дишла театриз актерди кьабул апIуру. Дидхъан думу хайлин спектаклйириъ иштирак шулу.
Гьюкуматдин табасаран драмтеатрин сягьнайиин Акимди гъийин йигъаз хайлин аьхю ролар уйнамиш дапIна. Думу иштирак шулайи спектаклйирикан вари ктибтуз удудукьур, хъа дугъу уйнамиш апIурайи игитари гъийин деврин инсанарин хасиятар, уьмрихьна лигбар, кIван гьиссар, аьхю устадвалиинди улупура. Гьарсар тамашачийи актериз чан кьимат тувру, яна сариз сар актерин устадвал кьабул гъабхьиш, тмунури жара актериз заан кьимат тувуб мумкин ву. Хъа Акимдин гьякьнаан вари тамашачйирин фикир саб вуйибси вуйиз. Аким гъи табасаран жямяаьтдин, Гьюкуматдин табасаран драмтеатрин коллективдин ва ярар-дустарин арайиъра аднан актер духьна. Театри бицIидариз ва мектебариъ урхурайидариз вуйи спектаклйирра дивра. Думу спектаклйириъра Акимди бицIи тамашачйир тяжуб апIруси, ролар уйнамиш апIура.
Акимдин хъана жара хъуркьуваларра а. 2021-пи йисан Мягьячгъала шагьриъ «Дадайикан гаф» кIуру шиърар республикайин дережайиъ урхбан конкурс кIули гъубшну. Думу конкурсдиъ вари республикайиан 96 кас иштирак гъахьну. Жюрийи конкурсдин иштиракчйири шиърин гафар гъалатIар ктарди пувализ, гьисслувализ, урхбан тясирлувализ ва мянайиз асас фикир тувнийи ва 1-пи йишв гъадабгъур Аким Сяидялиев гъахьну.
2023-пи йисан Москвайиъ, Мягьячгъалайиъ ва Каспийскдиъ кинотеатрарин аьхю залариъ ихь ватанагьли, режиссер Тахмина Гьяжикеримовайи адабгъу «Бурж» кIуру жикъи метраждин фильм улупну. Душваъра кми-кмиди Акимди аьхю устадвалиинди кIулин роль уйнамиш гъапIну. Аким Сяидялиевдиз Дербентдиъ, Табасаран ва Хив районариъ кIули гъягъру жюрбежюр конкурсариъ, фестивалариъ иштирак хьуз кми-кмиди дих апIури шулу.
Гьелелиг 30-йискьан дубхьну адру Акимди табасаран театрин имбу бажаранлу актерарихъди сабси ихь халкьдихьна жвуван багъри культура рубкьуз хайлин ликар аладгъну. Гъит чан яратмиш’валин рякъюъ дугъаз хъана заан хъуркьувалар ишри.
