Урусатдин Федерацияйиъ Халкьдин сабвалин йигъ къайд апIбахъди аьлакьалу вуди, Дагъустан Республикайин Глава Сергей Меликовдин указдиинди, РД-йин культурайин министр Зарема Бутаевайи Дагъустандин культурайин ва искусствойин гъуллугъчйириз гьюкуматдин наградйир тувну. Наградйир тувдарин арайиъ 4 ихь ватанагьлира а.

Табасарандин гьюкуматдин драмайин театрин кIулин режиссер Жамбулат Гьябибовдиз «Дагъустан Республикайин искусствйирин лайикьлу деятель» ччвур тувну.

Дагъустандин М.А.Жемалин ччвурнахъ хъайи художествойин училищейин мялим Айбике Мягьямедовайиз «Дагъустан Республикайин халкьдин художник» гьюрматнан ччвур тувну.

Региондин табасаранарин милли культурайин автономияйин председателин заместитель Эльмира Аьшурбеговайиз «Дагъустан Республикайин культурайин лайикьлу гъуллугъчи» гьюрматнан ччвур тувну. (Мидин гьякьнаан учу улихьнаси газатдиъ хабар тувнийча).

Урусатдин художникарин Союздин ва дизайнерарин Союздин вакил Изаят Межидовайиз РД-йин культурайин министерствойин Гьюрматнан грамота тувну.

Гьюрматлу ватанагьлийир! Гьюкуматди ичв гъапIу ляхниз заан кьимат дивну, учву лайикьлу ччвурар тувбахъди тебрик апIури, учвкан гьаруриз жандин мюгькам сагъ’вал, хушбахтлу уьмур, гележегдиъ ихь культура бадали зигурайи
зегьметнаъ хъана заан хъуркьувалар ккун апIурача