Ихь ватанагьли, Хив райондин Гьяригъ гъул’ан вуйи Замир Гьяжимурадов Дагъустан Республикайин Главайин теклифчиди тяйин гъапIну. 3-пи июли мидин гьякьнаан вуйи къарарнахъ Сергей Меликовди къул гъизигну.
Замир Гьяжимурадов «Игитарин вахт» кIуру президентдин программайиъ иштирак шула. Думу гьацира 2022-пи йисхъанмина хусуси метлеб айи дявдин операцияйин иштиракчи ву. Урусат Федерацияйин Яракьлу кьувватарин гъуллугънаъ ади дугъан гьамус 20 йис ву.
Эскервалин гъуллугънаъ чав улупу гьунарариз лигну, Замир Гьяжимурадов Кьягьялвалин ордендиинди, Луганск Хьалкьдин Республикайин «Буржназ вафалувализ» ва хъанара жара медалариинди лишанлу дапIна.
Эвленмиш духьна, 4 велед тербияламиш апIура.
«Табасарандин нурар» газатдин коллективдин терефнаан Замир Гьяжимурадов тебрик апIури, дугъаз чан таза гъуллугънаъ хъанара артухъ хъуркьувалар ккун апIурача.
