1-пи апрелиъ Дагъустандин премьер-министр Аьбдулмуслим Аьбдулмуслимовдин бабкан духьну 65 йис тамам гъабхьну. РД-йин мялуматарин ва чап апIбарин Агентствойин кIулиъ айи Арсен Юсуповди ва «Табасарандин нурар» газатдин коллективди дугъан юбилей кIваантан тебрик гъапIну.

«Гьюрматлу Аьбдулмуслим Мухудинович!
Узу ва Дагъустан Республикайин журналистарин тешкилатди уву бабкан духьну 65 йис тамам хьпан юбилей лап марцци кIваан тебрик апIурача.

Уву республикайин министрарин кабинетдин кIулиъ айи шубуд йисандин арайиъ Дагъустандиъ хайлин цирклар заан ери ади артмиш хьуз хъюгъна.

Гъи уву зигурайи зегьметну Дагъустан гьясиллувалинна экономикайин мюгькам ва девлетлу мумкинвалар айи, образованиейин ва сагъламвал уьбхбан ужуб гъурулуш хъайи, чан улихь аьхю планар диврайи региондиз илтIибкIура.

Яв жягьтлувалиинди Дагъустан Республикайин мялуматарин дакьатарин цирклин артмиш’вал жанлу дубхьна. Милли чIалариинди вуйи газатариз ва журналариз, дурар уьрхбаз ва артмиш хьувализ уву дикъатниинди фикир туврайиб рябкъюрачуз. Милли чIаларин текрар апIуз даршлу тафавутвал уьбхбан важиблувал гафариинди ваъ, ляхнариинди тасдикь апIурава.
Уву бабкан гъахьи йигъан увуз ляхниъ хъуркьувалар, улихь дивнайи метлебар кIулиз удучIву, ярхи ва хушбахтлу уьмур ккун апIурача», – дупна тебрикнан кагъзиъ.