Зубайдат Шябанова

Сентябрин эвелариъ Табасаран райондиз ляхнин командировкайиз гъушиган, газатдин редакцияйин журналистари саб жерге идарйирин кIулиъ айидарихъди гюрюшар гъурхнийча. УСЗН-дин кIулиъ айи Тельман Гьяжиевдихъди (шиклиъ) вуйи ич сюгьбат асас вуди Украинайиъ гъябгъюрайи хусуси метлеб айи операцияйиъ иштирак шулайи жигьиларикан гъабхьнийи.

«Табасаран райондиан сач, уьлкейин президентди мялум гъапIу бегьем дару мобилизацияйин дахилнаъди хусуси метлеб айи операцияйиъ иштирак хьуз 154 кас гъушну. Дурарикан 53 эскер контракт йибтIбан къайдайиинди душнайидар, 98 кас мобилизация дахилнаъди ва 3 эскер чпин хушниинди.

2022-пи йисан 21-пи сентябриъ 647-пи нумрайиккди кьабул гъапIу «РФ-диъ мобилизация мялум апIбан гьякьнаан» РФ-дин Президентдин Указдиин биналамиш духьну, хусуси метлеб айи дявдин операцияйиз гъягъюрайи дагъустанлуйириз ва дурарин хизанариз пулин кюмек тувбан гьякьнаан 2022-пи йисан 14-пи октябриъ Дагъустан Республикайин Правительствойи тялукь къарар кьабул гъапIнийи. Думу къарарниинди мобилизация мялум гъапIу вахтна РФ-дин яракьлу кьувватариз гъуху, гьацира чпин хушниинди СВО-йиъ 2022-пи йисан 24-пи февралихъан иштирак шулайи эскрариз Дагъустандин правительствойин терефнаан 100 агъзур манат улупна. Думу пул Табасаран райондиан 154 эскру гъадабгъну.

Ихь эскрар чпин игитвалиинди, дирбаш’валиинди тафавутлу шула. Гьяйифки, игитарин арайиъра дявдин женгариъ гъийихдар шулу. Гьаци, Табасаран райондиан гъийин йигъаз 63 эскер гъийихну. Дурикан 60 эскрин хизанари пособйир гъадагъна, 37 хизанди – учхьан, хъа 23 хизанди – жара регионариан», – къайд гъапIну Тельман Гьяжиевди.
УСЗН-дин кIулиъ айирихъди гъабхьи сюгьбат яркьуди учу газатдин гъюру нумрйирикан сабдиъ тувдича.