Гюльнара Мягьямедова

31-пи мартдин гвачIнин ухди Дагъустандин кьюб шагьриъ террориз аькси операция гъабхурайиваликан мялум гъапIнийи. Мягьячгъалайиъ ва Каспийскдиъ гизаф квартирйир ккайи хулариъ боевикар ади гъахьну. ХатIайихьан уьрхбан бадали, багарихь хьайи хулариан инсанар хатIасуз йишвариз адаънийи.

 

СМИ-йи туврайи мялуматариинди, Мягьячгъалайиъ хусуси метлеб айи операция Шеболдаевдин ччвурнахъ хъайи кючейиъ гъубшнийи. Душваъ тахсир кипнайи кьюр кас ил-ишрат, йивбарин сес адарди гъидиснийи.

Хъа Каспийскдиъ Кавказский ва Амет-Хан Султандин ччвурнахъ хъайи кючйириъ хусуси метлеб айи операция гъубхнийи. Шак гъюрайи сабуну квартирайиъ фужкIа адайи, тмуну квартирайиъ айидари раккин тIапIри гъахьундар. Гьаддиз кьувват ишлетмиш апIуб лазим гъабхьнийи. Квартирайиъ кум адапIру шашкйир ирчнийи ва сар террорист гъидиснийи. Тахсиркрар яшамиш шулайи квартирайиъ автоматар, дурарихъ хъивру гюллйир ва террористари гьязур дапIнайи тIуркIру сяняаьтар гъидихъну.

КТО-йин натижайиъ къанун уьбхру органарин гъуллугъчйири жара уьлкейин ватандашар вуйи шубур тахсиркар гъидиснийи. НАК-дин мялуматариинди, бандитар террориствалин гьяракатар гъахуз гьязур шулайи.

ФСБ-йин улупбариинди, зулумкрар Каспийскдиъ гьюлин гъирагъдихъ хъайи бульвариъ ва шагьрин паркдиъ инсанар гизаф айи вахтна террориствалин актар кIулиз адагъну, жара уьлкейиз гьергну гъягъбанди гъахьну.

Хъа РФ-дин Федеральный хатIасузвалин гъуллугънан улупбариинди, 31-пи мартди Дагъустандиъ гъидису жара уьлкейин ватандашар 22-пи мартди «Крокус Сити Холл» концертар гъахру залиъ террориствалин гьюжум кIули гъубхдар пулихъди ва яракьдихъди тямин апIбаъ иштирак гъахьну.

Дагъустандин Глава Сергей Меликовди мялумат тувганси, Дагъус-тандиъ террористарин «шил» «Крокус Сити Холл»-диъ гъабхьи терактдин кьяляхъ ашкар гъабхьну. Дугъу хусуси метлеб айи операция ужуди кIули гъубху жавабдар гъуллугъарин вакилариз чухсагъул мялум гъапIнийи. Гьацира республикайин Главайи дагъустанлуйирикан мугъаятвал уьбхюб ккун гъапIнийи.