Зубайдат Шябанова
Улихьна йигъари Табасаран райондин ТIюрягъ гъул’ан вуйи Асият Мирзабалаева Вариурусатдин бицIидарин шиклар зигбан «Граммариз пай дапIнайи уьмур» конкурсдин гъалибчи гъахьну.
Къайд дапIну ккундуки, му конкурс РФ-дин Федеральный Собраниейин Федерацияйин Советдин кюмекниинди 2021-пи йисхъанмина гъабхурайиб ва Ватандин Аьхю Гъалибвализ бахш дапIнайиб ву.
Цци онлайн къайдайиинди кIули гъубшу шиклар зигбан конкурсдиз яшар 7 йислан 18 йис’ина вуйи 200 агъзурихьна бицIидари ва живанари Аьхю Гъалибвализ, совет халкьдин ва уьру эскрарин гьунарариз бахш дапIнайи чпин ляхнар хътаъну.
Асиятдихъди ва дугъан абйир-бабарихъди узу дурар Москвайиан гъюбан кьяляхъ сюгьбат гъубхунза.
Асиятди цци 5-пи класс ккудубкIну. Шиклар зигуз думу бицIивахтнаанмина юкIв алир ву. Шураз шиклар зигру бажаранвал дадайихьан гъафну. Дугъан дада Гюльмира Мирзабалаева, шиклар зигру ужур устад-художник ву. Думу республикайин хайлин конкурсариъ гъалиб духьнайир ву.
«Узу ва йиз жилир Мирзабала ич ТIюрягъ гъулан мектебдин мялимар вуча. Жилири тарихдин дарсар кивра, узу ккергъбан классарин мялим вуза. Узу шиклар зигбаан нубатнан конкурсариз гьязур шули ляхнихъ хъюгъруган, вая адашди тарихи гьядисйирикан ктибтруган, Асиятди дикъатлуди чан фикир уч’ина жалб апIуйи. Ич лап ултIукьу ими Вейс Мусаевра Ватандин дявдин иштиракчи ву. Думу 1944-пи йисан «Женгнаъ улупу игитвалариз» медалиинди лишанлу гъахьнийи. Вейс аба 64-пи армияйин дахилнаъди Сталинград уьбхру женгариъ иштирак гъахьну. Белоруссияйиъ гъягъюрайи женгариъ дугъаз кьюб гъагъи зиян гъабхьнийи. Асиятди адашдиз дугъкан, дявдикан, гъуландари дявдин йисари фронт бадали гъизигу баркаллу зегьметнакан, кюгьне вахтарин уьмрикан кми-кмиди суалар тувру. Конкурсариъ думу мектебдин сабпи классдиз гъушу йисхъанмина иштирак шулайир ву – сифте мектебдин, хъасин райондин, республикайин ва Урусатдин дережйириъ. Гъалибваларикан улхуруш, сад йисан Асият уьлкейин 4-5 аьхю конкурсариъ иштирак шула ва саки варидариъ пешкешнан йишвар гъадагъура», – ктибтура Гюльмира Мирзабалаевайи.
Урусатдин Федерацияйин Советдин конкурс Варихалкьарин бицIидарин йигъаз ва Ватандин Аьхю Гъалибвализ бахш дапIнайиб вуйи. Асиятди «Фронтдиз гъулан кюмек» тема ктабгъну.
Асиятди терроризмдихъди женг гъабхбан ва дявдин темайиз вуйи шиклар лапра бажаранвалиинди зигуру. Улихьнаси Табасаран райондиъ «Дявдиъ дишагьлийирин гьунар», «Ватандин Аьхю гъалибвализ» темйириан муниципальный дережайин конкурсар гъахьнийи. Гьадрариъ Асиятди сабпи йишвар гъадагъну.
Шиклар зигбалан гъайри, Асиятди мектебдиъра ужуди урхура, райондин литературайин цирклиан вуйи конкурсариъ ва хусуси метлеб айи дявдин операцияйиъ айи эскрариз кагъзар дикIбаъра иштирак шула. Чан кагъзарик Асиятди эскрарин рюгь за апIру, мани гафарра кади, гъалибвал гъадабгъну дурар гъяйиз, багъри гъулаъ ва райондиъ дурариз ккилигурайиваликан бикIура.
«Урусатдин Федерацияйин Советдин конкурсдиз 200 агъзур ляхин хъадаънайи. Вари ляхнар дявдикан вуйи, хъа йизуб — халкьди фронт бадали гъизигу игитвалин ва баркаллу зегьметнакан. Гьадрарикан варидарикан варитIан ужударстар 80 ляхин гъядягъну, 40 – жюрийи, 40 — агьалйирин сесериинди. Гьадму 80 ляхникан варитIан ужудар 19 ляхин финализ удучIвну. Жюрийи, йиз ляхин варидаригъян тафавутлу шулайиб гьисабназ гъадабгъну, узуз гъалибвалин йишв тувну.
Жюрийи натижйир йивбан кьяляхъ, учуз Москвайиан Совет Федерацияйиан зенг гъапIну ва финалиъ иштирак хьуз гъизигу шикил хьади гъюб теклиф дивну. Душваъ финализ удучIву 19 ляхнин выставка тешкил гъапIнийи. Гьадму выставка Урусатдин вари Игит-шагьрариъ гъабхуру.
Узу, Федерацияйин Советдин илимдин, образованиейин ва культурайин Комитетдин председатель Лилия Гумерова кIулиъ ади, уч духьнайи вари гьякимариз ва иштиракчйириз йиз ляхникан, йиз багъри ТIюрягъ гъулан вакиларикан, гьадму гьисабнаан жилиинди тадахьну вая улдудутIди гъядахьну гъузу дяхнин кIулар фронтдиз уч апIури гъахьи бицIидарикан, ктибтунза. Йиз ляхниз дурари варидари заан кьимат тувну. Федерацияйин Советди узуз туву пешкешартIан, душваъ учуз тешкил гъапIу экскурсия кьабул гъабхьунзуз», – ктибтура Асиятди.
Асиятдиз дявдин темайилан гъайри табиаьт, гьяйванатар ва дишагьлийирин палтарин цIийи модайин эскизарра зигуз ккуниб ву. Чан ляхнар дугъу сабпи нубатнаъди дадайиз улупуру. Дада дугъан варитIан дугъри ва гьякьлу кьимат туврайи мялим ву.
Гъит му бажаранлу шуран заан хъуркьуваларикан ухьуз хъанара ебхьуз кьисмат ибшри.
