Наргиз Гюлечова

 

Дагъустандин глава Сергей Меликовди туризмдинна халкьдин сяняаьткарвалин министерствойиз республикайиъ артмиш шулайи туризм сирниккан ккадабгъбан уьлчмйир агбан ляхин гъабхуб табшурмиш дапIна.

 

Главайи тувнайи табшуругъ тамам апIбан ляхин фици кIули гъабхураш, циркил сирниккан ккдабгъбаъ фицдар уьлчмйир кьабул апIураш ва гьацира гъийин йигъаз официально вуди туризмдин цирклиъ лихурайи касарин гьякьнаан РД-йин туризмдинна халкьдин сяняаьткарваларин министрин заместитель Мягьямед Гьябибуллаевди мялумат тувну.
Дугъан гафариинди, лазим вуйи къайдайиинди, яна налогар туври ва гъазанжар жин дарапIди туризмйин цирклиъ ляхин давам апIуваликан хайирра а, миди гъюрайи туристарин хатIасузвалра уьбхюра.

«Сергей Алимовичди ич улихь дивнайи месэла гьял апIури, циркил сирниккан ккадабгъуб чарасуз вуйивал гьисс дапIну, гостиницйириъ, хялар кьабул апIру хулариъ рейдар гъахурача. Му ляхниъ, министерство-йихъди сабси, МВД, Ространснадзор, Роспотребнадзор, Дагъустандиъ айи федеральный налоговый гъуллугънан управление ва жара тешкилатар иштирак шула. Ккудубшу йисанра му жюрейин ахтармишар кIули гъахбиинди, 167 туризмдиъ ляхин апIурайи объектарикан 40 объектди налог тутрувди, къанунсузди ляхин гъабхурайивал ашкар гъапIну.

Гъийин йигъаз республикайиъ къанундиинди ляхин апIурайи 17 санаторий, 164 хялар кьабул апIру хулар, 103 турбаза ва 366 гостиница а. Гьамушвариъ кьабул апIурайи хяларин хатIасузвалра лазим вуйи къайдайиинди уьбхюра. Республикайиз гъюрайи туристар кьабул апIру, къанундиинди лихурайи йишварихъан туврайи налогарин кьадарнакан душваъ айи шараитарин ерира асиллу ву», – гъапну министрин заместители.
Пресс-конференцияйиъ журналистари цирклиъ ляхин апIурайи гидарин месэлара гъитIибккнийи. Мягьямед Гьябибуллаевди гафариинди, гьамусяаьт респубдикайиъ официально вуди атестация дубхнайи 167 гидди ляхин апIура. Асас вуди дурар тарихдин, географияйин, инглис чIалнан мялимар ву. Гьаци вушра, дурарин кьадар гьубкIну адар.