Умгьанат Сулейманова
Магьа бицIидарин варитIан ккуни хьадан тятIиларин вахт дуфну хъубкьна. ТятIилар багахь хьбахъ, дурари сарун, чпи наан вахт гьапIну ккундуш, улигьккимиди гъайгъушнаъ шулу. Ав, ихь гъийин девриъ бицIидариз рягьятвал гъадабгъру жюрбежюр шартIар яратмиш дапIна.
Гьаму улихьна йигъари Дагъ. Огни шагьриъ Урусатдин Игит Исрафил Мягьямедовдин ччвурнахъ хъайи 4-пи нумрайин мектебдиъ бицIидариз вуйи «Бригантина» лагерь абццбан шадлугънан линейка кIули гъубшну.
Лагериъ шубуб десте тешкил дапIна: «Ригъ», «ДеккучIимир», «Хядар». Гьарсаб дестейиъ 20 бицIир а. Дурар 7-11-пи классариъ урхурайидар ву. Душваз цIийина СВО-йин иштиракчйирин ва гизаф веледар хъайидарин бицIидар кьабул апIура. Хъа бязи абйир-бабар хьадан тятIилари чпин хизандин дуланажагъ тямин апIуз, сацIиб вушра кюмек ибшри кIури, жара йишвариз лихуз, гъазанмиш апIуз гъягъюри шулу – дурарира чпин бицIидар лагериз гьаъру.
Улихьна йисари мектебдин яшнаъ айи баяр-шубар хьадан вахтна совхоздиз лихуз гьаъри шуйи. Жигьил насил загьметниин юкIв алди, гьарсабдин гъадри, хайирнан ва зарарнан гъавриъ ади живанди имидитIан вердиш шуйи. Гьацира жигьилар лазим дару ляхнарихьан ярхла апIуз, хайирлуди вахт адапIуз загьметну кюмек апIуйи.
Хъа аьхиримжи йисари мектебариъ урхурайидари фици вахт адапIураш, чпихьан, урхурайидарихьан гьерхдихьа.
Атаева Марьям, Дагъ. Огни шагьур:
Узу юкьубпи классдиз удучIвунза. Ич хизандиъ аьхюну риш вуза. Учу шубур чи вуча. Хьадан тятIиларин сабпи вазли йиз бицIи чуччуз хъайивал апIуз дадайиз кюмек апIури, вахт-вахтарик шиклар зигури, аьлава вуди китабарра урхури, йиз юлдаш шубарихъди тамширра апIури шулза. Хъа тятIиларин кьюбпи вазли, адашди лагериз гьауз гаф тувунзуз. Хъасин дадайихъди Москвайизра гъягъюруза.
Мирзаев Усман, Дербент шагьур:
Узу Дербентдиъ яшамиш шулаза. Гьамус юкьубпи классдиз удучIвназа. Узу хьадан тятIиларин аьхирихънаси гъулаъ ич аьхю бабахь вахт адапIури шулза. Бабаз шюхъяриз хъайивал апIуб, бицIи кIари хъапIуб, бистниъ дурзнайи чрушнарихъ шид хъубзуз кюмек апIуб – мурар йиз варитIан ккуни ляхнар вуйиз. Гьелбетда, китабар урхувалра кIваълан гьапIдарза. Йиз дустарихъди нирихъна жикIузра гъягъюри шулза.
Саидмягьямедов Селим, Дагъ. Огни шагьур:
Узу кьюбпи классдиз удучIвназа. Хьадан тятIиларин вахтна узу ич дадайиз кюмекар апIури шулза. Дада ич тукандиъ лихура. Йиз аьхюну чве Алимдихъди учу кьюридари хулаъ учхьан шлуб апIури шулча. Дада саспиган ляхниан инжиг духьну гъюру вахтар шулу. Гьамус, узура хулаъ кюмек апIруган, дугъаз хайлин рягьятди ву.Дициб мумкинвал айи, узкан ва йиз гъардаш Алимдикан дада гизаф разиди ву.
