Наргиз Гюлечова

18-пи сентябриан 20-пи сентябриз ихь республикайиз Уфайин гьюкуматдин татарарин «Нур» театр гъюбанди ву. Дупну ккундуки, Дагъустандин театрарира, гьар йисан жара регионариз гъягъюри, чпин спектакларра улупура. Мицисдар культурайин гьядисйир Урусатдин культурайин министерствойи 2014-пи йисхъанмина уьмриз кечирмиш апIурайи «Аьхю гастролар» федеральный проектдин дахилнаъди кIули гъягъюра. Проектдиз деетнайи дакьатарихъ регионарин театрарихьан чпин апIурайи ляхин жара регионаризси, федеральный дережайизра адабгъуз шула.

 

Гастролйирикан яркьуди республикайин журналистариз Дагъустандин РИА-йин конференцйир гъахру залиъ РД-йин культурайин министрин сарпи заместитель Мухтар Къурбановди, Гъумугъ театрин директор, Урусатдин искусствйир лайикьлу гъуллугъчи Скандарбег Тулпаровди ва ихь республикайиз гастролйириз гъюрайи театрин директор, Башкортостандинна Татарстандин культурайин лайикьлу гъуллугъчи Фирзат Габидуллинди ктибтнийи.
«Нур» театрин директор Фирзат Габидуллинди гъапиганси, Дагъустандиз спектаклйир хьади гъюб Уфайин театриз лап мяналу гьядиса ву, ва театрин коллектив ухдихъанмина дидиз ккилигурайи.

«Цци, Дагъустан ва Башкортостан республикйирин правительствйири сатIиди ляхин апIуз йикьрар йитIну, 30 йис тамам дубхьна. Учу Дагъустандиз гъювал гьаму гьядисайиз бахш апIурача. Ичв республикайиз ич театри 3 спектакль хиди ва татар чIалнан гъавриъ адру касариз урус чIалназ таржума апIру синхронра гьязурди а.

Ильгиз Зайниевдин «Мюгьюббатнан гьялкъа» аьлхъбан спектакль ву. Эсфир Ягудиндин «Гьякьлу малайик» пьеса музыкальный комедия ву, хъа Ильдар Юзеевдин «Дагъ» спектакль драма ву. Дурар вари Дагъустандин тамашачйириз кьабул шлувалиин умудлу вуза», – гъапнийи Фирзат Габидуллинди.
– Цци Уфайин театрин спектаклйир Мягьячгъалайиъ ерлешмиш дубхьнайи Гъумугъ театриъ улупура, хъа гъюру йисхъантина Дербентдиъра улупуз планариъ а, аьлава гъапIнийи «Нур» театрин директори.