Гьаму гьяфта пашман мялуматарилан ккебгъну. Дагъустанди, ихь халкьди чаинди дамагъ апIурайи Эседулла Абачев больницайиъ ккаъну.

17-пи августди йишвну Курский областдиъ Рыльск-Хомутовка трассайиъ Урусатдин кьушмарин десте Украинайин боевикарин гьюжумдикк ккабхъну. Натижайиъ РФ-дин Яракьлу кьувватарин «Север» кьушмарин дестейин командующийин заместитель, Урусатдин Игит, ихь ватанагьли генерал-лейтенант Эседулла Абачевдиз гъагъи зийнар гъахьну. Генерализ дишлади гьяракатнан медицинайин кюмек тувну. Дидин гьякьнаан Дагъустандин Глава Сергей Меликовди мялумат тувра. Дугъу къайд гъапIганси, гьамусяаьт генерал дявдин медицинайин варитIан ужуб центриъ ккаъна, дугъан сагъламвалин гьял гъагъиб вушра, гучI апIбан ляхин адар.

Ухьуз мялум вуйиси, Эседулла Абачев, Украинайиъ хусуси метлеб айи дявдин операция ккебгъу сабпи йигъарилан башламиш дапIну, дявдин женгариъ иштирак шула, гьадму гьисабнаан 2022-пи йисан июлин вазли ЛНР-иъ Лисичанск шагьур гъадабгъбан женгариъ дугъан хликк ккайи кьушмари аьхю дирбаш’вал улупну. Думу, Урусатдин Игитси, ЛНР-ин Игитра ву. Донбас миллетчйирин аьзабнаккан азад апIбак Эседулла Абачевдин лайикьлу пай ка. Гьаму вахтнан арайиъ дугъу швнубна саб заан гъуллугъариъ Ватандин маракьар уьрхбаъ вафалу гъахьну.

Дагъустан Республикайин Гла-вайин табшуругъниинди Эседулла Абачевдин регьберваликкди гъуллугъ гъабхури гъахьи, гьамус Дагъустандин Огни шагьрин мэр Замир Гьяжимурадов Москвайиз ихь генералиин улукьуз гъушну. Ич журналистди дугъахъди сюгьбат гъубхну. Замир Гьяжимурадовди къайд гъапIганси, Эседулла Абачевдин гьял гъагъиб вушра, думу сагъ хьувалик умуд киврахьа. «Лап багарихьди узура Эседулла Абачевдиин улукьуз гъягъюб планламиш апIураза», – гъапну Сергей Меликовди.

Ав, умуд киврухьа: Аллагьдин амриинди Эседулла Абачев сагъ шул. Газатдин редакцияйин коллективди Аллагьдикан ихь дирбаш генерализ сагъвал тувуб ккун апIура.