Умгьанат Сулейманова
Улихьна йигъари Вариурусатдин улариз кьитди рябкърударин жямяаьтлугъ тешкилатдин, Дагъустандин региондин жямяаьтлугъ тешкилатдин 95 йис хьпаз тялукь вуди ва Дербентдин ерли тешкилатдин 95 йис хьпан юбилейин гъаншариъди Дербентдиъ шадлугъар кIули гъушну.
Улариз кьитди рябкърударин Дербентдин ерли тешкилат, Дербент ва Дагъ. Огни шагьрарин ва Кьибла Дагъустандин 8 райондин улариз дярябкърударин гъуллугънаъ а. Серенжем гъябгъюрайи вахтна Вариурусатдин улариз кьитди рябкъру жямяаьтлугъ тешкилатдин председатель Хавлаттип Назиргьяжиевди Дербент шагьрин глава Ханлар Пашабеговдиз ва администрацияйин гъуллугъчйириз чпиз гьаммишан аьхю фикир тувбаз ва серенжем мициб къайдайиинди тешкил апIбаз лигну чухсагъул гъапнийи. Дербент шагьрин главайин заместитель Видади Зейналовди, Ханлар Пашабеговдин ччвурнахъан тешкилатдин вакилар тебрик гъап1нийи.
«Улариз рябкъюб инсандиз чарасуз лазим вуйи ляхнарикан гьисаб апIуру. Яш дубхьну, лапра цIибдитIан улариз дярябкърударикан «гьамци, улариз дярябкъри хьайиз, деребхьри духьнади ккундийзуз», кIуру гафар кми-кмиди ерхьуру. Гьелбетда, деребхьри хьувалра ужуб ляхин дар, хъа улариз дярябкъри хьувал – му лапра гъагъиб гьисаб апIуру, гьаз гъапиш инсанди рябкъювалиинди гизаф кьадар мялуматар гъадагъуру. Мицисдар касариз учу гьаммишан кюмек апIуз гьязур вуча. Ва дурариз аьхю фикир туврайи, Агьалйирин яшайишдин игьтияжар гьуркIбан комплексдин центриъ (КСЦОН) лихурайидаризра аьхю чухсагъул дупну ккунду. Думу гизаф жавабдар ляхин ву», – гъапнийи Видади Зейналовди.
Табасаран райондиъ улариз дярябкърударин тялукь жямяаьтлугъ адарди хьпаз лигну, думу йигъан райондин вакилариз Вариурусатдин улариз дярябкърударин жямяаьтлугъдин Дербент шагьриъ айи ерли тешкилатдиз теклиф гъапIнийи. Табасаран райондиъ улариз кьитди рябкъювалин инвалидарин кьадар 51 кас ву. Дурарин арайиъ, шахматарин ва шашкйирин турнирариъ гъалиб духьну, сабпи йишвар гъадагъну айидарра айиштIан! Райондиан йирхьур касдиз Дербентдин серенжемдиз теклиф гъафнийи – Ярса гъул’ан вуйи Аьбдулжалил Гюлечевдиз, Валид ва Казбек Гьюсеевариз, Гъалиб Маматовдиз ва Жвулли гъулан агьали Рамин Сафаралиевдиз.
Табасаран райондин КСЦОН-дин руководитель Тимур Аьлиевди дурар Дербентдиз гъахуб тешкил гъапIну ва дурарихъди чавра гъушну.
Серенжемдиъ му касариз, чпин улариз кьитди рябкъюри ашра, уьзриз мютIюгъ дархьиди, чпихьан шлу саягъниинди райондин ва республикайин шашкйирин ва шахматарин спортивный талитариъ иштирак хьувализ лигну, гьюрматнан грамотйирра тувну. Табасаран райондин Агьалйирин яшайишдин игьтияжар гьуркIбан комплексдин центрин кIул вуйи Тимур Аьлиевра гьюрматнан грамотайиинди лишанлу гъапIнийи.
Серенжем концертдин программайихъди давам апIури, мяълийирин устад Расмия Абасовайи, Ислам Велихановди, Наиля Шихмурадовайи, Аьбдулла Мирзакеримовди, Хуршида ва Даштибег Исмяиловари лирикайин ва ватанпервалин мяълийир гъапIнийи.
