Наргиз Гюлечова
16-пи июндиъ ихь уьлкейиъ Медицинайин пишекрин йигъ къайд гъапIну. Гьадму йигъахъди аьлакьалу вуди, чан уьмрин аьхюнубсиб пай инсанар сагъ апIбаз бахш гъапIу ихь ватанагьли, Дербент райондин КIежюх гъулан бицIидарин духтур Рамазан Гюлечовдикан бикIураза.
Рамазан Гюлечов Ватандин Аьхю дяви ккебгъу 1941-пи йисан Хив райондин Кьуликк гъулаъ аьдати нежбрин гизаф бицIидар айи хизандиъ бабкан гъахьну. Думу вахтна дугъан абйир-бабари далу терефнаъ ляхин апIурайи. ИкибаштIан, дявдин йисар касиб йисар вуйи ва гьубкIну ипIруб, алабхьру палат адайи. Гьаци вушра, чпин веледар дурари аьжузвал гьисс апIури аьхю гъапIундар.
Рамазан Гюлечовди, 1956-пи йисан Ляхлаарин 7 йисандин мектеб ккудубкIну, Хиварин кьялан мектебдиъ урхувал давам апIуру. Хъа 1960-пи йисан, Хиварин кьялан мектеб ккудубкIну, кьяляхъ, Дербент шагьриъ айи медучилищейик урхуз кучIвру.
«Медучилищейиъ 4 йисандин арайиъ урхури гъахьунза. Студент вахтар гьаруриз варитIан ширин, гьаргандиз кIваинди гъузру вахтар ву. Гьаци, думу вахтар йиз гъира кIваин илмийиз.
1964-пи йисан урхуб ккудубкIну, багъри гъулаз хъадакну гъафунза ва дишлади ляхин апIузра хъюгънийза. Ляхла гъулан медпунктдин заведующийди дерккнийзу. Думу терефназди айи 4 гъулан агьалйир гьаму медпунктдиз дахил шулайи, ва дурарин сагъламвализ лигури гъахьунза.
Пуз шулу, медицинайин ужуб тажруба гьадмуган гъабхьунзуз. Фицики, жара пишекрар гьуркIну адрувализ лигну, духтирвалин саки вари пишекрарин ляхин узу тамам апIури гъухьунза. Гьятта гьямила, гъагъи гьялнаъ айи дишагьлийиризра кмиди кюмек апIуйза. Хъа саспиган, иццури айидарин хулариъ гьадрарихъди гъузри шлу вахтарра гъахьнийиз. ЦIиб вахтналан гъунши гъул’ан вуйи риш Аслийихъди хизанра ккебгъунча.
Гьарсаб жюрейин иццрушнар кайи агьалйир сагъ апIури айивализ лигну, хизан ккебгъну цIиб вахттIан дашра, заан образование гъадабгъуз кьаст дапIну, 1968-пи йисан Дагъустандин гьюкуматдин медицинайин институтдин лечебный факультетдик урхуз кучIвунза. Йирхьуд йисандин арайиъ гьадушваъ дурхну, 1974-пи йисан, Дагъустандин Огни шагьрин кьялан больницайин ЛОР-отделениейиъ хъюхънин, ибарин ва дюдерин духтир хьпан бадали, интернатурара гъурхунза», – ктибтнийи йиз сюгьбатчийи.
ИкибаштIан, тазади хизан ккебгънайи касдиз, хизандихьан, бицIидарихьан ярхлади, ялгъузди яшамиш хьувал читин ляхин ву. Гьаци вушра, Рамазан Гюлечовди чав урхурайи йисари хизан гъулаъ гъибнийи. Интернатура ккудубкIбалан кьяляхъ думу, Хив райондин кьялан больницайиъ пишекрар гьуркIну адрувализ лигну, направлениейиинди гьадина гьаънийи.
«1975-пи йисхъанмина Хив больницайиъ лихури, гьар йисан узухьна хъюхънихъди, ибарихъди ва дюднихъди аьлакьалу иццрушин кайи хайлин инсанар илтIикIури шуйи. Узухьна гизафси хьади гъюрудар бицIидар вуйи. Гьаму жюрейин иццрушнар кайи агьалйирин 130-тIан артухъ операцйирра гъапIунза.
Эвелиан Ляхлаарин медпунктдира хайлин йисари лихури бицIидар сагъ апIбан тажрубара айивализ лигну, 1978-пи йисан хъюхънин, ибарин ва дюдерин духтрин пишекарвалиан бицIидарин духтир хьпан бадали, ДГМИ-йин духтрарин пишекарвалин дережа за апIру факультетдиъ пишекарвал дигиш апIбан курсар гъурхунза.
Дидин кьяляхъ 1980-пи йисазкьан Хив больницайиъ бицIидарин духтирди дилихну, 1981-пи йисан, сарун йиз хизанра хъади КIежхиз удучIвну гъушунза»,
– кIура Рамазан Гюлечовди.
Дидхъанмина 43 йисандин арайиъ думу КIежхин участокдин больницайиъ лихури гъахьну. Гьадушваъ 20-йисантIан артухъ вахтна, духтраринна медсестрйирин бригадайин аьхюну духтирдира гъахьну.
Рамазан Гюлечов 1-пи категорияйин духтир ву. Ужур пишекар вуйивализ дигну, думу РД-йин сагъламвалин министерствойиан ва Дербент райондин администрацияйихьан швнуб-саб грамотайиинди ва гьюрматнан кагъзиинди лишанлу дапIна.
Рамазан Гюлечов гьацира хулан ужур эйсира, веледариз ккуни адашра ву. Рамазандина Асли Гюлечовари 4 байна 2 риш тербияламиш гъапIну, дурариз 19 худул ва 12 гудул а.
Рамазан Гюлечовдин гьарсаб алдабгъурайи ликрихъ дугъан уьмрин юлдаш Асли Гюлечова хъади гъахьну. Дурари хизан ккебгъну, 60 йискьан дубхьна.
Асли Гьясратялиевна, аьдати табасаран шубарси, бицIи вахтарихъанмина халачи убхурайир вуйи. Дугъанра халачачивалин тажруба 35 йистIан артухъ ву. Дугъу гъурху халачйир гизаф уткандар вуди гъахьну, ва дурар экспортдиз гъаърира шуйи.
– Ужур халачачи-устад вуйивализ лигну, дугъаз 5-пи разрядра а, ва, кIакIначи халачачиси, медалииндира лишанлу дапIна.
Гъит му ужуб албагу хизандиз хъанара артухъ сагъ’вал ибшри ва Аллагьди ярхи уьмур туври.
