Мейлан Нежефов

Хив райондин Хив гъулан М. Шамхаловдин ччвурнахъ хъайи кьялан уьмуми образованиейин мектебдин 9-пи классдиъ урхурайи Тамерлан МутIалибовди гьаму улихьна Москвайиъ ММА-йин кчIихбариан кIули гъубшу Урусатдин чемпионатдиъ 1-пи йишв гъадабгъну.

 

Тамерландин хъуркьуваларикан узуз дугъан аьхю баб Эрзи МутIалибовайи ктибтнийи.
«Тамерлан 2009-пи йисан 16-пи июнди Хив гъулаъ бабкан гъахьну. 2015-пи йисан думу сабпи классдиз гъушнийи.

Сабпи йигъланмина Тамерлан йиз хилариин аргъаж гъахьи велед ву. Дугъан адаш – йиз бай Тигеран иццурайир ву. Тамерландин дада, бай дитну, жарариз швуваз гъушну. Гъи Тамерланди учв чан кьяляхъ хъайи Мальвина ва Сальмина чйирин далу вуйиб субут апIура. Кьюбпи классдиз гъягъяйизра думу тренерар Гьяжирамазан Гьяжиевдихьна ва Гьясан Мягьямедбеговдихьна гъулан спортзализ гъягъюз хъюгънийи. Гьелбетда, хтул му ляхнихьна жалб гъапIур йиз уьмрин юлдаш Мирамудин вуйи. Хъа гъи ухьуз рябкъюрайиганси, Тамерлан мид’ин швумал гъахьундар.

Гъулаъ гъягъюрайи тренировкир ктарди, думу гьяфтайи шубубан Сардаркентдиъ ММА-йин тренерди лихурайи Камиль Аьбдурягьмановдихьнара гъягъюра. Гьаци дугъу гъийин йигъаз, Хив райондиъ, Кьасумкентдиъ, Дагъ. Огни, Дербент, Мягьячгъала шагьрариъ кIули гъягъюрайи талитариъ иштирак шули, швнуб-саб пешкешнан йишвар гъазанмиш дапIна, гьадму гьисабнаан юкьуб садпи йишварра.

Спортдиин кIваантIан машгъул хьували Тамерландин урхбаз затра манигъвал туврадар. Сабпи классдихъанмина йиз хтулин шикил мектебдин Гьюрматнан тахтайик кебхна. Сачдин урхбан йисан думу райиондин «Сарпидарин гьяракат» жямяаьтлугъ тешкилатдин председателдира ктагънийи. Гьам урхбаъ, гьам спортдиъ гъазанмиш гъапIу хъуркьувалариз лигну, Тамерлан гъи хайлин грамотйириинди, кубкйириинди ва гьюрматнан пешкешариинди лишанлу дапIна. Учв гьеле кюрпе бай вушра, дугъак аьхюр-бицIир гюзет апIуб, жарарин хликк ккайи гъагъназ кюмек тувуб, рякъ-хулиъ йишв улупуб, адмивализ хас вуйи гьякь-гьюрматнан гьамцдар лишнарра ка», – дамагъ кади ктибтура Эрзи бабу.