Гюльнара Мягьямедова
Урусатдин халкьарин чIаларин йигъ къайд апIбан гьякьнаан 2025-пи йисан 5-пи июнди Урусатдин Президент Владимир Путинди Урус чIал уьбхбан советдин заседаниейиъ къарар кьабул гъапIнийи. Теклифнан метлеб уьлкейин чIалар уьрхюб, гьюкуматдин культурайин ирснан гьюрмат уьбхюб ва миллетарин арайиъ сабвал мюгькам апIуб ву. Статистикайин улупбариинди, Урусатдиъ 270 бабан чIалар ва диалектар а. Думу йигъ Дагъустандин машгьур шаир Расул Гьямзатов бабкан гъахьи йигъан къайд апIбанди гъахьнийи.
8-пи сентябри вари ихь уьлкейиъ Расул Гьямзатов бабкан гъахьихъанмина 102 йис тамам хьпахъди аьлакьалу кIваин уьрхбан серенжемар кIули гъушну. Дагъустандиъ 6-пи сентябрилан 10-пи сентябризкьан варихалкьарин «Лизи кьарнйирин йигъар» фестиваль кIули гъябгъюра.
«Думу машгьур шаир Расул Гьямзатовди бина ккиву аьхю машквар ву. Машкври Москвайиан, Санкт-Петербургдиан, Донбассдиан, Башкирияйиан, Татарстандиан, Чувашияйиан, уьлкейин жара регионариан йицIбариинди литературайиин лихурайидар, писателарин союзарин вакилар, шаирар уч апIуру. «Лизи кьарнйир» фестиваль ихь машгьур ватанагьлийихьна, дявдин женгарин ветеранарихьна, дявдин чюлиъ гъийихдарихьна вуйи ихь дерин гьюрмат улупбан лишан ву.
Дугъриданна, бабан чIалназ гьаму кьадар фикир туву жара литератор агуз читин ву. Ухьуз дугъан шиърар сабвалихьна, гьякьлувалихьна, инсанвалихьна дих апIурайи лизи кьарнйирин рамаг вухьуз», – гъибикIну чан телеграм-каналиъ Дагъустандин кIулиъ айи Сергей Меликовди.
8-пи сентябри республикайин главайи Расул Гьямзатовдин хизандин вакиларихъди сабси шаирин накьвдихъ кюкйир дивну.
Фестивалин дахилнаъди Дагъу-стандиъ шаирин яратмишариз бахш вуйи шиърар урхрударин «Ачухъ микрофон» конкурс, аьхю Гъалибвалин 80 йисаз бахш вуйи «гергми стол» кIули гъушну. Гьаму йигъари республикайин Хунзах райондиъ, Гунибдиъ, Дербентдиъ Расул Гьямзатовдин гьюрматназ вуйи серенжемар гъягъюра.
***
Мягьячгъала шагьрин кьялан библиотекайиъ, шагьрин администрацияйи, меркездин культурайин управлениейи, библиотекйирин сатIи вуйи гъурулушди тешкил дапIну, Дагъустандин халкьарин бабан чIаларин сабпи фестиваль кIули гъубшну. Фестивалин дахилнаъди Дагъустандин аьхюну пай халкьарин чIалариинди Расул Гьямзатовдин «Кьарнйир» кIуру шиир урхбан акция кIули гъубшну. Му йигъан «Кьарнйир» шиир урус, гъумугъ, дарги, лезги, лак, табасаран, азербайжан, нугъай, агъул, чечен, рутул, цIахур, тат чIалариинди гъурхну. Бабан чIаларин сабпи фестивали цIийи аьдат арайиз гъабхну, цIийи проектариз, Дагъустандин халкьарин культурайинна чIаларин ирс артмиш апIбаз рякъ кивну.
