Зубайдат Шябанова
Гьар йисан 22-пи августдиъ Урусатдин Федерацияйиъ Гьюкуматдин пайдгъин йигъ къайд апIуру. Му йигъахъди республикайин ватандашар Дагъустандин глава Сергей Меликовдира тебрик гъапIну. Вари уьлкейиъси, республикайин районариъра машквриз тялукь серенжемар кIули гъухну.
Машквар йигъан Табасаран райондиъ Ургур чвуччвун ва сар чуччун гъалайин аьтрафариин Урусатдин гимндин мукьмихъди лап аьхюди гьязур дапIнайи гьюкуматдин пайдагъ ккатIабццну. Думу акцияйин кьяляхъ тарихдинна юрд аьгъю апIру музейин улихь машквриз бахш вуйи митинг кIули гъубшнийи. Уч духьнайидар машкврихъди тебрик апIури, Табасаран райондин глава Мягьямед Къурбановди къайд гъапIганси, му машквар къайд апIувал ихь уьлкейиъ йислан-йисаз кьувватнаъ убчIвра. Пайдагъ – му ихь Ватандин, багъри Урусатдин багьалу лишнарикан саб ву. Думу уьбхюри, гъи ихь хайлин ватандашари СВО-йин дахилнаъди женгар гъахура.
Серенжемариъ иштирак хьуз Мягьячгъалайиан дуфнайи РД-йин туризмдин ва халкьдин художествойин сяняаьтарин министрин заместитель Анна Безруковайи чан удучIвну улхбаъ Табасаран райондиъ багъри юрд ва ватан ккуни гьякьикьи ватанперверар яшамиш шулайиваликан гъапнийи.
Думу йигъан райондиъ 14 йис яш гъабхьи живанариз РФ-дин ватандашарин паспортар тувну, жюрбежюр выставкйир ва туристарин сейир тешкил гъапIну. Сейриъ райондиан 250-тIан артухъ инсанар иштирак гъахьнийи. Жигьилари думу маршрутдин саб пунктнаъ – Хифарин багъдиъ – спортдин жюрбежюр жюрйириан талитарра кIули гъухну.
Хив райондиъра Урусатдин пайдгъин йигъ яркьуди къайд гъапIну.
«Фунуб аьсриъра пайдагъ ватандин кьувватлувал ва асиллу дарувал улупури, гьюкуматдин асас вазифйир, улихь дивнайи мэселйир арайиз адагъурайи, халкьдихъан ва ватандихъан дамагъ арайиз хурайи лишан ву. Ватандин пайдгъиккди важиблу къарарар кьабул апIура, уьлкйирин арайиъ аьхю мяна айи йикьрарар йитIура, сюгьбатар гъахура; ихь эскрари, ватан уьбхюри, игитвалиинди женг гъабхура, хъа спортсменари гъалибвалар гъадагъура. Пайдгъихьна вуйи гьюрмат – думу багъри тарихдихьна, культурайихьна, аьдатарихьна вуйи гьюрмат ву», – гъапну Хив райондин глава Ярмет Ярметовди райондин агьалйир машкврихъди тебрик апIури.
Машкврин йигъан Хив райондин гъуларин ва райондин асас библиотекйириъ китабарин выставкйир, стендар тешкил гъапIну ва флешмобар гъухну. Райондин культурайин цирклин гъуллугъчйири, мектебариъ урхурайидари райондин варитIан ягъли йишв’ин гьюкуматдин пайдагъ гьатIабццну. Хирижв, КъанцIил ва жара гъуларин бицIидарин багъариъ думу машквраз бахш дапIнайи серенжемар кIули гъухну.
