Гьюрматлу мусурман чвйир ва чйир! Магьа ихь гирами Рамазандин вазра аьхирихъна гъафну. Учу учву улубкьнайи машкврихъди кIваантIан мубарак апIурача. Гъит Аллагьу Тяаьлайи ухьу гъидису ушвар, гъапIу гъудгнар, дюъйир, туву садакьйир, ихь ужудар ляхнар ва ниятар кьабул апIри.

Фукьан ухьу гьяйифар гъизигишра, ккудудукIру ужувлари абцIнайи гьаму йисандин гирами Рамазандин вазра гъубшну. Ихь ккуни вуйи Пайгъамбри (с.аь.в.) гъапну: «Эгер Рамазандин вазлин гьарсаб кьиматлуваликан инсанариз аьгъяйиш, дурариз думу ваз гьаммишан давам шули ккун хьибдийи».

Рамазандин ваз мусурмнариз, Кьур’ан урхури, улупнайиси ушвар дисури, Первердигар Аллагьдикан гунгьарихьан азад апIуб ккун апIури, рюгь марцц апIуз тувнайиб ву. Эгер мусурмнари Рамазандин ваз Аллагьдин рякъюъди адапIнуш, рюгьнан марццивал ярхи йисазди гьубкIну ккунду.

Сабсан ражари ичв машквар мубарак ибшри, гъюру машквар улубкьайиз Аллагьди ичв жанар сагъди, юкIвар шадди, хизандиъ мясляаьт, хулаъ берекет ади гъитри, дюн’яйиъра ислягьвал ибшри.