Гьюрматлу мусурман чвйир ва чйир!

Ухьу гьамкьан вахтари ккилигури гъахьи Рамазандин гирами ваз, улра хъмиди, аьхирихъна гъафну. Му ваз уьмрин рякъюъ деету гъалатIариин швумалвал зигуз, Первердигариз ккарагури, Дугъкан ихь гунгьарилан хил алдабгъуб ккун апIуз, ихь дисурайи ушвар ва рягьимлувалин ляхнар кьабул дапIну, жан сагъ, рюгьра марцц апIуз ухьуз мумкинвал тувнайи ниъмат ву.

Ихь гъидису ушварин, йишвну мистариъ сатIиди гъапIу таравигь-гъудгнарин, жвуван багахьлуйирихъди ва гьацира дин хъапIрайи чвйир-чйирихъди албагну, шадди кIули гъуху ифтарарин, хизандин арайиъ гъахьи сюгьрин ушв бисуваларин – гьаму Рамазандин вазли 30 йигъан ухьуз Аллагьди тувнайи ктухуз даршлукьан ниъматарин, сувабарин тIяаьм ва берекет ихь хизанариъ гьаргандиз гъубзри.
Ихь ккуни Пайгъамбрин (саллалагьу аьлайгьи вассалам) гьядисдиъ дупна: «Эгер Рамазандин вазлиъ айи вари ужувларикан йиз уммайиз аьгъяйиш, дурари гьаму ваз ярхи йисди давам хьуб ккун апIидийи» (Ибн Хузейма, «Сахих», 1886, Байхакый, «Шугабуль Иман», 3634). Гъит Аллагьу Тяаьлайи гъюру йисанра Рамазандин ваз къаршуламиш апIуз ухьуз сагъвал туври.

Гьюрматлу ватанагьлийир, учву улубкьурайи ушварин машкврахъди кIваантIан тебрик апIурача. Гъит ихь гъидису ушвар, гъапIу гъудгнар, гьарсарихъан туву ушварин сеэр, садакьйир, хайирлу ляхнар ва кIван марцци ниятар Аллагьу Тяаьлайи кьабул апIри ва Чан рягьимлувалиан ухьуз аьхю савабар дикIри. Гъит гьаму Рамазандин вазлин гирамивалиан Аллагьу Тяаьлайи ухьуз мюгькам сагъвал, кIван шадвал, хулаз берекет, хизандиз мясляаьт хури, язиъ айидар сагъ-саламатди чпин кюлфетарихьна кьяляхъ гъюри, гъит ихь халкьдин вакилар чпин марцци умударихъ хъуркьри, дюн’яйин ляхнариъра, писвал ккабгъну, дугъривал, гьякьвал ва ислягьвал гъалиб ибшри!

Газатдин редакцияйин коллектив