Зубайдат Шябанова

Гьаму йигъари Хючна гъулаъ Кьалухъ Мирзайин ччвурнахъ хъайи спортдин дараматдиъ волейболиан «Уьсмановарин Кубок» республикайин турнир кIули гъубшну. Талитар Табасаран райондин ТОКС-дин кIулиъ ади гъахьи Аьлимягьямед Уьсмановдин гьюрматназ бахш вуди, райондин администрация-йин, Аьлимягьямед Уьсмановдин багахьлуйирин ва дугъан дустарин жягьтлувалиинди тешкил гъапIуб вуйи.

 

Талитар ачмиш апIури райондин глава Мягьямед Къурбановди къайд гъапIганси, Аьлимягьямед Уьсманов Шила гъулан мектебдиъ 30 йистIан артухъ гъилихну, дугъу райондиъ сарпир вуди ТОКС-дин тешкилат ачмиш гъапIну. Думу кечмиш хьайиз райондин мектебариъ урхурайи швнуд-сад агъзур живанар ТОКС-дин тешкилатдин вакилар вуди гъахьну. Аьлимягьямед Уьсмановди жигьиларин швнуб-саб наслиз ватанпервер тербия тувну, багъри ватан, уьлкейин тарих ккун апIуз улупну.

Аьлимягьямед Уьсманов спортдиин, хъа асас вуди волейболиин юкIв алир вуйи. Дугъан жягьтлувалиинди Табасаран райондиъ гьар йисан волейболин турнирар гъахури гъахьну.
Гьамус му гьюрматлу касдин ччвурнахъ волейболин турнирар гъахувал аьдатнаъ ипра. Ццийин йисандин талитариъ иштирак хьуз райондиз республикайин варитIан улихь хьайи 6 команда гъафнийи. Дурар Мягьячгъала ва Дербент шагьрарин, Табасаран, Хунзах, Шамил ва УнцIукIул районарин командйир вуйи.

Полуфинализ Мягьячгъалайин, Табасарандин, УнцIукIул, Шамил районарин командйир удучIвнийи. Натижайиъ шубубпи йишв УнцIукIулин командайин спортсменари гъадабгъну.
Финалин матчдиз Табасаран ва Шамил районарин командйир удучIвну. Шубуб партияйикан вуйи уйнамишариъ 2:1 гьисаб сабпи йишв’ина Шамил райондин волейболистари гъазанмиш гъапIну, ва дурар Уьсмановарин Кубокдин сарпи сагьибар гъахьну.

Турнирин гъалибчйириз ва пешкешнан йишвар гъадагъдариз кубокар, медалар, грамотйир ва пулин премйир тувну.