Наргиз Гюлечова
Гьар йисан июндин вазлин эвелариъ кIули гъябгъюрайи Варихалкьарин Петербургдин экономикайин форумдиъ сач Чувашия Республикайинна Дагъустандин, цци кIуруш, Узбекистандинна Дагъустандин улихь-кIулихь хьайидари ариш-веришчивалинна экономикайин цирклариан сатIиди ляхин апIуз вуйи йикьрар гъийитIнийи. Улихьна йигъари Узбекистандин Бухара областдиан делегацияра Дагъустандиз дуфну, республикайин экономикайин циркларихъди таниш духьну, сатIиди ляхин апIбан планра тартиб гъапIну.
Кьюрид республикйирин ариш-веришчивалинна экономикайин цирклариан сатIиди ляхин апIбан серенжемарин дахилнаъди, арайиъ айи аьлакьйир яркьу апIбан бадали, июлин аьхиримжи йигъан Мягьячгъалайиъ айи Милли библиотекайиъ Узбекистандиъ гьясил гъапIу шей’арин ярмарка кIули гъубшну. Ярмарка Чувашия Республикайин бизнесдин вакилари тешкил дапIнайиб вуйи. Му серенжемарин асас метлеб, Чувашияна Дагъустан регионарин ва Урусатдинна Узбекистандин халкьарин арайиъ ужудар аьлакьйир уьрхюб ву.
Асас вуди ярмаркайиз духнайидар хьайиканна бамбгикан гьязур дапIнайи, гьаму деврин жигьилари алахьру ва мектебариъ урхурайи баяр-шубариз вуйи хусуси формайин палтар вуйи.
Серенжемдиъ Дагъу-стандин образованиейинна илмарин министр Ягь’я Бучаев, РД-йин экономикайинна аьтрафарин артмиш’валин ва промышленностдинна ариш-веришчивалин министрин заместителар Шамиль Аммаев ва Гьяжимурад Исрапилов иштирак гъахьну.
Ягь’я Бучаев, Чувашия Республикайи Дагъустандиз духнайи палтариз лигбан кьяляхъ, вари шей’ар заан ерийиинди дидирхну, ужуб парчайикан гьязур дапIнайидар вуйиб мялум гъапIну.
Ярмаркайиз улупуз духнайи, мектебариъ урхурайидари алахьру палтар, гьаму деврин технологйириинди, Германияйиан, Японияйиан ва Турцияйиан вуйи ужудар палтар дирхру каDurkopp AdIer, Pfaff, Brisay, BuIImer, IGM, A-S-S, Juki, StrobeI машинарихъ дидирхну, гьязур дапIнайидар ву.
Министрихъди сабси ярмаркайиз дуфнайи имбуну хяларра Дагъустандиз духнайи сурсатдихъди таниш гъахьну
«Узбекистандин Наман-ганский областдиъ парчайикан гьязур апIру шей’арин циркил лап ужуди артмиш шула. Чувашия Республикайира гьадму областдихъди сатIиди ляхин апIура. Гъи гьаму ярмаркайиз духнайи шей’ар, Урусатдина Узбекистанди сатIиди апIурайи ляхнин натижайиъ арайиз гъафидар ву.
Ич терефнаан кIуруш, Дагъустандин экономикайинна аьтрафарин артмиш’валин министерствойи, гъи гьаму ярмарка тешкил дапIнайи Чувашия республикайинна Дагъустандин арайиъ ариш-веришчивалинна экономикайин аьлакьйир йитIбан бадали, кюмек апIуз гьязурди а», – аьлава гъапIну Шамиль Аммаевди.
