Гюльнара Мягьямедова

Командайиъ туп уйнамиш апIували бицIириз учв хайирлу ляхнин иштиракчи вуйиб аннамиш апIуз, чпи вердиш апIурайирихъ хъпехъуз, чан таярихъди уртахъ ляхин апIуз улупуру, чаз айи мумкинвалар ачмиш апIуз кюмек тувру.

Улихьнаси Кафари Кавказдин ва Кьибла федеральный округарин футболин мектебарин арайиъ гъахьи талитариъ иштирак гъахьи ужударсдар футболистарин сиягьнаъ Амин Ражабовдин ччвур гъябкънийиз.

Амин Ражабов 2008-пи йисан Мягьячгъалайиъ военный гъуллугънаъ айи абйир-бабарин хизандиъ бабкан гъахьну. Дугъан абйир-бабар Хив райондин ВертIил гъул’ан ву. Балин 4 йис гъабхьиган, Ражабовар Астрахандиз удучIвну гъушну.

Амин бицIи вахтнахъанмина зирекур вуйи. Гьаммишан туп хьади кючйириз тамшйир апIуз гъягъюйи. Мектебдиъ физкультурайин мялимдиз балин кIубанвал гъябкъиган, думу бицIидарин футболин клубдиз гьаувалин теклиф дивнийи. 2014-пи йисан Амин футболин командайиз гъадагънийи, ва думу, эргвал гьисс дарапIди, футболиин машгъул гъахьнийи», – ктибтура дугъан адаш Тельман Ражабовди.

«Учу гьар йигъан ич тренер Иван Постоевдихъди тренировкйир гъахури шулча. Дугъу учкан низам-къайда тIалаб апIуру: тренировкйириз кьан дарапIуб, туп апIбаъ темпелвал хай даршлуб, мектебдиъ дарсар ужуди аьгъю апIуб. Астрахандин йисар бегьем духьну адру баярин «Волгарь» командайин дахилнаъди учу уьлкейин гизаф шагьрариз – Краснодариз, Казандиз, Саратовдиз ва хъана жара йишвариз ич яшнан баярин командйирихъди талитариз гъягъюри шулча. Аьхиримжи ражари 14-пи майдиъ Каспийск шагьрин «Анжи Арена» стадиондиин Мягьячгъалайин «Динамо» командайихъди гюрюшмиш гъахьнийча. Талит 1:1 гьисабниинди ккудубкIнийи.

Футболиъ узу гъадагъурайи хъуркьуваларик ич тренерин, ич командайин ва йиз адашдин лайикьлу пай ка. Гележегдиъ уьлкейин заан дережайиъ айи футболин лигайиъ туп уйнамиш апIуз кьаст айиз. Узу йиз уьмур футболихъди аьлакьалу гъапIунза, гьаддиз футбол дарди сад йигъанра гъузуз шулдарзухьан», – гъапнийи ич сюгьбатнаъ Амин Ражабовди.

Аминдиз чан кIваъ айи мурадар-метлебар тамам хьувал ккун апIурахьа.