Наргиз Гюлечова
Гъийин заманайиъ, хъа асас вуди шагьрариъ сар сариз таниш дару касар рякъюъ алахьиш, пул дарди машиндиъ итну гъахуз думукьан аьшкь ади шулдар гъапишра, узу гъалатI даршул. Хъа вушра, гьюрматна кюмек апIуз ккунидар гьелелиг алахьури имиду. Мидин гьякьнаан цIиб улихьнаси йиз уьмриъ гъабхьи саб гьядисайикан ктибтуз ккундузуз.
Талат йигъ вуйи. Узу гьар талат йигъан «Дагъустан» ГТРК-йиъ табасаран чIалниинди передачйир гьязур апIуз гъягъюри шулза. Гьаму ражарира ляхниз гъягъюз кIури, Мягьячгъалайиз гъябгъру транспортдиз ккилигури, Каспийск шагьрин «Анжи АРЕНА» стадиондин улихь хьайи остановкайикк дийигънайза. Дюзди кIуруш, жандин гьялар ужидира адайиз – думуган саки 38-дихьна температура удубчIвнайиз. Саб бицIи арайилан йиз гъвалахъ рулихъ дишагьли хъайи Hyundai Solaris машин дебккнийи. Машиндиан: «Мягьячгъалайиз гъягърудар аш, гъачай, эай», – дих гъабхьнийи. Мугъан машиндиъ эур сар узутIан гъахьундайи.
Аьдати йигъари Каспийскдиан узу ляхниз гъягъюрайи йишвахьна, сабдиан сабдиъ эъри, 2 вая 3 маршрутка гьюдюхну, 1 сяаьтна гьацIтIан артухъ вахтна рякъди душну ккунду. Дишагьлийи, узу наанди гъягъюрайир вуш, гьерхнийи ва, чав гъягъюрайи терефнаан йиз ляхнихьнакьан гъябгъюрайи маршрутка дебккру йишвахьна гъахурзаву кIури, узхьан машиндиан эдеуз гъитундайи. ИкибаштIан, температура ади иццурайи узу, машиндиъ гъузуз рази гъахьиза – чIат «цIа убгъурайи» ва, машиндиан эдеъну, ригъдикк дийигъуз зат шуладайи.
Йиз ляхнин гъвалхъантина гъябгъру маршрутка дийибгъру йишвахьна хъуркьунчу. Гьадушвхьан ярхла дарди му дишагьли яшамиш шулайи хуларра хьайи. Думу чан хулаз дурушди, уьлра гъадабгъуз кади, маршрутка хьаш лигуз удучIвнийи. Кьяляхъ гъафири дугъу узуз: «Гъи гьаз-вуш маршруткйир адар. Гъач узу уву Лениндин чвурнахъ хъайи кючейизкьан гъахурзаву. Сарун гьадушвхьан жарабдиъ эарва», – гъапнийи. Рази гъахьундайза – мугъан чанра ляхин ашул, хъа узу фици вушра мушвхьан гъягъярза, фикир гъапIнийза. Амма му камаллу хасиятнан дишагьлийи, узу кIурайибдихъра хъпебехъди, Лениндин ччвурнахъ хъайи кючейиз ваъ, хъа йиз ляхнизкьан чан машиндиъди чIанади гъухнийзу. Рякъюъди танишра гъахьунча – дугъаз Тамила кIуру, учв Гъяйтагъ райондиан ву.
Му ужуб дюшюшнан ляхин йиз гьаргандиз кIваинди гъубзди. Гьаддиз, газатдин машариантина Тамилайиз чухсагъул мялум апIуз ккундузуз. Гъит дугъаз жандин мюгькам сагъ’вал ва рякъюъ гьаммишан ягъур ибшри.
